VIKEKE, 12 Fevereiru 2026 (TATOLI)—Diretór Servisu Apoiu Organizasaun Naun Governamentál no Komunitária Munisípiu Vikeke, Cosme Sarmento, informa autoridade Munisípiu Vikeke prevee ona orsamentu hamutuk rihun $76 hodi sosa motorizada marka Verza unidade 38 iha tinan ne’e hodi apoiu servisu Konsellu Polísiamentu Komunitáriu (KPK) iha suku 38.
“Motorizada sira-ne’e ita distribui ba suku depoiz ita-nia xefe suku sira mak sei responsabiliza,” Cosme Sarmento ba TATOLI iha resintu Administrasaun Munisípiu Vikeke, Kinta ne’e.
Nia esplika orsamentu sosa transporte referidu aloka husi orsamentu Munisípiu Vikeke nian, atu apoia ba KPK bainhira mosu konflitu ruma mosu iha suku karik sira bele akompaña xefe suku sira hodi bá halo atuasaun.
Daudaun ne’e, Cosme dehan, servisu ONG no komunitária hatama ona pedidu kompra motorizada nian ne’ebé kada motorizada ho kustu $2.000.
Entretantu, Munisípiu Vikeke iha suku hamutuk 38, aldeia hamutuk 234. Husi númeru ne’e, iha suku balun PNTL seidauk estabelese KPK mak hanesan Suku Uma-Ua’in Kraik, Suku Nahareka, Uaibobo, Uabubu, Suku Afaloikai, Suku Babulu no sira seluk.
Jornalista: Vitorino Lopes da Costa
Editór: Xisto Freitas da Piedade
