DILI, 12 Fevereiru 2026 (TATOLI)—Ministru Transporte Komunikasaun (MTK), Miguel Gonçalves Manetelu apela ba ina-aman labele fó telemóvel ba menoridade sira uza, hodi evita asesu site pornográfiku.
Ministru Transporte Komunikasaun, Miguel Gonçalves Manetelu, apela atu asegura menoridade sira-ne’ebé utiliza telefone hodi asesu ba informasaun negativu hanesan site pornográfiku, inan-aman sira maka tenke tau atensaun labele fasilita telemóvel ba labarik sira no laiha kontrolasaun entaun labarik sira asesu duni informasaun negativu sira.
“Estadu iha atu haree, maibé kontrola másimu liu ne’e husi inan-aman tanba sira mak fó telefone ba labarik sira hodi halimar haree youtube sira,” Ministru Manetelu hateten ba Agência Tatoli iha Palásiu Governu, kuarta (11 Fevereiru 2026) ne’e.
Iha biban ne’e, Prezidente Autoridade Nasionál Komunikasaun (ANC, sigla portugés), Flávio Cardoso Neves, hateten ho prezensa kabu-submarinu entaun ANC sei ko’alia kona-ba polítka sibernétika nomós ko’alia ona ho PCM atu kria mekanizmu di’ak, tanba iha reguladór haree maibé ko’alia asuntu ne’e sei liga liu ba rede oin rua mak lokál no interasionál.
“Agora ita buka mekanizmu oinsá mak sai obrigasaun ba operadór ISP hodi hatene kanál ne’ebé mak sira tenke halo ho objetivu atu proteje seguransa ba ema hoot liuliu site pornográfiku,” nia hateten.
Nia hatutan, tanba ANC iha de’it kompeténsia atu proteje iha parte rede nian, enkuantu ISP mak sai na’in ba rede bainhira iha atake ruma bele identifika lalais ho sistema ne’ebé iha. Nia fiar katak ANC iha polítika ne’ebé di’ak tanba asuntu ne’e sériu liga ona ba sidadania.
Jornalista : Alexandra da Costa
Editór : Cancio Ximenes
