DILI, 12 Fevereiru 2026 (TATOLI)–Primeiru-Ministru, Kay Rala Xanana Gusmão, rekoñese iha duni mosu injustisa iha prosesu rekrutamentu kandidatu ba vaga membru Polísia Nasionál Timor-Leste (PNTL) foun tinan 2026.
Notísia Relevante: Governu suspende temporária-revee konkursu públiku admisaun iha kursu formasaun ba ajente PNTL
“Kona-ba problema iha rekrutamentu, entaun iha Konsellu Ministru ami haree, rezolve hasai rezolusaun ida atu suspende tia, tanba iha problema duni. Ami verifika haree, verifika la’ós hanesan problema maibé iha duni problema. Suspenda hodi kria komisaun ida, ne’ebé envolve Polísia husi ita-nian no Polísia husi Portugál, husi Australia, atu haree didi’ak hotu prosesu sira,” Xanana Gusmão hateten ba jornalista sira iha Palásiu Prezidensiál Nicolau Lobato, Bairru Pite, ohin.
Xanana dehan, kria ekipa internasionál atu haree no hadi’a problema sira-ne’ebé mosu iha prosesu rekrutamentu ne’ebé konsidera mosu familiarizmu.
“Monta ekipa foun atu haree sala iha ne’ebé hadi’a, atu nune’e evita tiha buat ida baibain sira dehan familiarizmu ne’e,” Xanana dehan.
Antes ne’e, iha kuarta (11 Fevereiru 2026), Konsellu Ministru aprova projetu Rezolusaun Governu, ne’ebé aprezenta husi Ministru Interiór, Francisco da Costa Guterres, kona-ba suspensaun temporária no revizaun ba Konkursu Públiku Admisaun iha Kursu Formasaun ba Ajente PNTL foun.
Ho desizaun ida-ne’e, Governu hakarak asegura transparénsia, legalidade no kredibilidade iha prosesu rekrutamentu, hodi konsidera dúvida no preokupasaun sira-ne’ebé hato’o husi kandidatu sira no entidade oioin kona-ba kumprimentu ba rekezitu balun no regularidade iha faze konkursu nian.
Ba ida-ne’e, Rezolusaun Governu prevee suspensaun temporária ba konkursu no reforsa mekanizmu supervizaun no fiskalizasaun.
Desizaun ne’e mós determina atu halo reestruturasaun ba Komisaun Monitorizasaun no Fiskalizasaun nian, liuhusi entegra membru nasionál no internasionál independente sira, nune’e mós halo revizaun kle’an ba faze hotu-hotu husi prosesu selesaun nian, ho nia objetivu atu hatene loloos faktu no potensialmente adota medida korretiva.
Ho prosedimentu id- ne’e, Governu iha intensaun atu hametin sidadaun sira-nia konfiansa iha instituisaun públika no atu garante katak asesu ba Polísia Nasionál Timor-Leste ne’e hala’o ho justu, imparsiál no tuir lei.
Notísia Relevante: Governu sei kria Komisaun Organizadora foun ba konkursu públiku admisaun ba ajente PNTL
Jornalista : Hortencio Sanchez
Editór : Cancio Ximeens
