DILI, 11 Fevereiru 2026 (TATOLI)–Governu liuhusi reuniauan Konsellu Ministru, kuarta ne’e, aprova projetu rezolusaun Governu ne’ebé aprezenta husi Ministru Interiór, Francisco da Costa Guterres, kona-ba suspensaun temporária no revizaun ba Konkursu Públiku Admisaun iha Kursu Formasaun ba Ajente Polísia Nasionál Timor-Leste (PNTL).
Notísia Relevante: Polémika rekrutamentu PNTL hein desizaun Konsellu Ministru
“Ho desizaun ida-ne’e, Governu hakarak asegura transparénsia, legalidade no kredibilidade iha prosesu rekrutamentu, hodi konsidera dúvida no preokupasaun sira-ne’ebé hato’o husi kandidatu sira no entidade oioin kona-ba kumprimentu ba rekezitu balun no regularidade iha faze konkursu nian. Ba ida-ne’e, Rezolusaun Governu prevee suspensaun temporária ba konkursu no reforsa mekanizmu supervizaun no fiskalizasaun,” refere nota imprensa Governu nian ne’ebé Agência Tatoli asesu, ohin.
Desizaun ne’e mós determina atu halo reestruturasaun ba Komisaun Monitorizasaun no Fiskalizasaun nian, liuhusi integra membru nasionál no internasionál independente sira, nune’e mós halo revizaun kle’an ba faze hotu-hotu hosi prosesu selesaun nian, ho nia objetivu atu hatene loloos faktu no potensialmente adota medidas koretiva.
Ho prosedimentu ida-ne’e, Governu iha intensaun atu hametin sidadaun sira-nia konfiansa iha instituisaun públika no atu garante katak asesu ba Polísia Nasionál Timor-Leste ne’e hala’o ho justu, imparsiál no tuir lei.
Notísia Relevante: Komisaun Rekrutamentu PNTL rejista aplikante na’in-400 hato’o rekursu ba MI
Jornalista : Alexandra da Costa
Editór : Cancio Ximenes
