DILI, 10 Outubru 2025 (TATOLI)—Komisaun Rekrutamentu Polísia Nasionál Timor-Leste (PNTL) foun 2025 rejista ema na’in-400 ne’ebé la liu prosesu selesaun dokumentu, hato’o rekursu ba Ministériu Interiór (MI).
Portavós Komisaun Rekrutamentu PNTL foun 2025, Superintende Polísia António da Luz hateten, sira ne’ebé la liu tanba balun falta dokumentu komprovativu, tanba ne’e sira-nia naran la sai.
“Tuir lei sira bele hatama rekursu durante loron-lima nia-laran, hahú husi publikasaun naran,” Portavós hato’o liuhusi konferénsia imprensa, iha Komandu Jerál PNTL, Kaikoli, Sesta ne’e.
Notísia relevante : Aplikante 12.851 ba vaga membru Polísia liu iha selesaun dokumentu
Tanba ne’e, iha loron-lima MI hasai ona despaisu hodi autoriza sira ne’ebé hatama rekursu bele kompleta sira-nia dokumentu.
“Agora sira bele admitidu no iha direitu tuir teste ne’ebé mak sei halo iha Domingu (12/10),” nia tenik.
Antes ne’e, Sekretariadu Komisaun Rekrutamentu simu dokumentu husi aplikante 13.770, kompostu husi mane 10.255 feto 3.515.
Jornalista : Natalino Costa
Editora : Julia Chatarina
