DILI, 09 Fevereiru 2026 (TATOLI)—Primeiru-Ministru (PM), Kay Rala Xanana Gusmão hateten, kona-ba polémika ka irregularidade familiarizmu iha rekrutamentu Polísia Nasionál Timor-Leste (PNTL), hein desizaun Konsellu Ministru (KM).
“Ami sei diskuste problema ne’e iha Konsellu Ministru, Kuarta (11/02), depoiz husu ba Ministru Interiór, Francisco da Costa Guterres,” PM Xanana dehan ba jornalista sira iha resintu Palásiu Governu, Segunda ne’e.
Notísia relevante: MI fó tempu loron 10 ba kandidatu aplikante rekrutamentu membru PNTL hato’o deklarasaun
Iha loron 03 Fevereiru 2026, Komisaun Rekrutamentu PNTL liuhusi Portavós Komandu Jerál PNTL, António da Luz, anúnsiu lista kandidatu kadete foun ba públiku liuhusi fonte mídia nasionál sira iha Timor-Leste ho totál kandidatu 12.874.
Husi númeru ne’e, kandidatu 10.597 mak aprovadu no kandidatu 2.277 mak la aprovadu. Husi kandidatu aprovadu sira, Komisaun Rekrutamentu deside katak iha kandidatu hamutuk 400 de’it maka sei tuir teste médiku, enkuantu kandidatu ho kategoria aprovadu sira seluk sei labele tuir.
Jornalista: Osória Marques
Editór: Xisto Freitas da Piedade
