DILI, 11 Fevereiru 2026 (TATOLI)—Ministru Interiór, Francisco da Costa Guterres, hateten hafoin Konsellu Ministru deside halo suspensaun temporária no revizaun, Governu sei kria fali Komisaun Organizadora foun hodi kontinua halo revizaun ba konkursu públiku admisaun Ajente Polísia Nasionál Timor-Leste (PNTL).
Notísia Relevante: Governu suspende temporária-revee konkursu públiku admisaun iha kursu formasaun ba ajente PNTL
Nia hatutan, bainhira sira rona reklamasaun hotu, hafoin lori mai iha KM tanba abertura konkursu mós KM mak deside, entaun lori fali mai para husu KM nia autorizasaun atu bele foti desizaun. no ohin aprezenta iha KM deside katak sira suspende tiha lai konkursu ne’e rasik, tanba sira presiza halo uluk verifikasaun no analiza didi’ak fali mak foin bele anúnsia fila-fali rezultadu.
“Aleinde ne’e, KM mós mandata ha’u atu reestrutura fali komisaun verifikasaun no supervizaun. Komisaun ida-ne’e sei kompostu husi entidade oioin inklui ema internasionál balun hanesan GNR husi Portugál no husi Austrália,” Ministru ne’e informa ba jornalista sira iha Palásiu Governu, ohin.
Nia dehan, sei fó servisu ba sira durante loron 20, atu halo revizaun tomak ba prosesu konkursu ne’e rasik no hafoin loron 20, sira sei rekomenda ba nia hodi hato’o fali ba KM atu deside medida saida mak sira bele foti.
Bainhira halo revizaun totál mak hetan problema ruma ka sira bele halo fila-fali parsialmente konkursu ne’e rasik no ninia prosesu ne’e tenke la’o ho di’ak.
“Komisaun Organizadora foun ne’e ita sei konvida GNR husi Austrália, GNR husi Portugál, ita tau mós ME tanba uluk ME mak fo prova kulturál ba sira inklui entidade sira iha laran ne’e iha jerasaun patriota, komisaun B, iha mós parte veteranu, depois promosaun igualidade mós iha laran hotu, jurista mós,” nia informa.
Tamba ne’e, suspende tiha konkursu ida agora ne’e para komisaun halo nia servisu durante loron 20, sei haree ba prosesu hotu-hotu, desizaun oinsá depois sira sei la’o tuir rekomendasaun ne’ebé komisaun fó.
Hafoin ide-ne’e mak komisaun sei haree se iha irregularidade ne’ebé maka’as, sira sei rekomenda ba atu repete fali teste balun, ne’e depende ba komisaun ne’e mak sei halo. Nune’e husu ba kadetes foun sira kalma, hodi hein komisaun halo servisu.
“Rezolusaun mak fó kompeténsia ba ha’u atu loke konkursu ne’e. Ha’u labele anula desizaun KM entaun ha’u tenke mai informa fali ba KM, nune’e KM fó fali autorizasaun para bele suspende bazeia ba rezolusaun ne’ebé sira fó mai ha’u. Tnaba, estatutu PNTL ne’e abertura ba konkursu públiku ne’e tenke hetan autorizasaun husi KM,” nia dehan.
Kandidatu kadetas PNTL husi Likisa, Pacoal Jardel Sousa Pereira Soares (idade 23), sente triste ho sistema rekrutamentu kadetas foun PNTL nian la’o grave ho sistema familiarizmu, nune’e ema barak mak la satisfaa tanba kandidatu admitidu sira barak-liu mak kompostu husi membru PNTL nia oan sira.
“Bainhira Governu suspende ne’e hanesan polítika de’it tanba dalaruma ema hirak ne’ebé admitidu nafatin rezerva ona, nune’e di’ak-liu ne’e taka totál hodi halo fali prosesu rekrutamentu foun,” nia hateten.
Tanba, nia dehan, ida-ne’e bele hamate esperansa juventude sira-ne’ebé hakarak kompete iha atu sai PNTL, no diskrimina ona ema seluk nune’e presiza sistema rekrutamentu ne’ebé kredivel no profisionál hodi labele uza sistema polítika familiarizmu.
“Karik haruka fali ami tuir teste, ha’u lakohi kompete ona tanba se lae ita gasta enérjia tanba ema iha família iha laran hodi fasilita sira-nia oan,” nia dehan.
Jornalista : Alexandra da Costa
Editór : Cancio Ximenes
