DILI, 10 Fevereiru 2026 (TATOLI)—Governu Timor-Leste kongratula Prezidente Portugál eleitu António Seguro ba nia vitória iha eleisaun prezidensiál Portugál nian.
Tuir nota ne’ebé Agência TATOLI asesu iha pájina Governu ne’e haktuir, Governu Repúblika Demokrátika Timor-Leste felisita Prezidente eleitu hodi hato’o mellor votu iha mandatu ida nakonu ho ézitu ba servisu Nasaun.
Ida-ne’e rezultadu ne’ebé di’ak tebes husi prosesu eleitorál ne’e, reflete konfiansa boot iha nia lideransa husi parte povu portugés, ne’ebé sai hodi ezerse sira-nia direitu, maske dezafiu oioin iha loron ikus.
Timor-Leste ho Portugál partilla amizade istórika ida-ne’ebé hatuur-metin iha língua, iha patrimóniu kulturál no iha lasu ne’ebé dura kle’ur ona entre povu rai rua ne’e.
Relasaun ida-ne’e, ne’ebé di’ak tebe-tebes durante Timor-Leste nia istória naruk, no hametin liután ho kooperasaun, kontinua hanesan fonte (ka, hun) husi forsa boot ida iha rai rua nia parseira ohin-loron.
Iha momentu tranzisaun ho inserteza iha nível globál ne’e, Timor-Leste rekoñese papél importante Portugál nian iha esforsus mundu tomak nian ba defeza multilateralizmu, igualdade no valór umanitáriu sira.
Timor-Leste hakarak servisu hamutuk ho Prezidente eleitu Seguro hodi hakle’an relasaun bilaterál no promove kooperasaun internasionál, solidariedade ho dignidade umana.
Ne’e inklui Timor-Leste nia kompromisu ne’ebé partilla ho Komunidade Paízes Língua Portugeza,ne’ebé sei sai nafatin hanesan pilár sentrál (ka, ai-riin boot) ida iha kooperasaun entre nasaun luzófona sira.
Governu Timor-Leste hakarak mós servisu hamutuk liuhusi kooperasaun metin ho Portugál durante mandatu Prezidente eleitu Seguro, iha espíritu amizade, respeitu no objetivu ne’ebé hanesan.
TATOLI
