DILI, 04 Fevereiru 2026 (TATOLI)—Governu liuhusi reuniaun Konsellu Ministru, kuarta ne’e, aprova projetu dekretu-lei ne’ebé aprezenta husi Ministru Justisa, Sérgio de Jesus Fernandes da Costa Hornai, kona-ba kódigu rejistu sivíl.
Ministru Justisa, Sérgio da Costa Hornai, hateten ko’alia kona-ba kódigu rejistu sivíl ne’ebé tinan kotuk nia parte aprezenta, iha mós hanoin balun ne’ebé presiza membru Governu sira kontribui no Primeiru-Ministru rasik fó nia hanoin própiu relativamente ba iha importánsia kódigu rejistu sivíl ninian.
“Nune’e, ohin, ami to’o iha konkluzaun ida katak bainhira hetan aprovasaun husi membru konsellu minsitru nian no konstituidu iha aprovasaun no koresaun uitoan ba iha situasaun balun no relasionál balun, ami sei ajusta para atu nune’e bele sai hanesan projetu-lei ida, hodi kontinua halo solusaun ba iha Parlamentu Nasionál,” Ministru Justisa ne’e relata ba jornalista sira iha Palásiu Governu, ohin.
Tanba, nia dehan, objetivu prinsipál mak atu bele fó dinamiza liután servisu sira iha rejistu sentrál no rejistu notariadu nian ba iha emisaun sira, ba iha dokumentu halo transkrizaun nian, tantu iha aktu sira ne’ebé iha relasionamentu rejistu sivíl nian liuliu kazamentu, sertidaun óbitu no guia de óbitu.
Oinsá mak bele halo prestasaun ho kualidade no labele iha intrupsaun, nia hateten, Governu mós tenke ejize servisu ho kuidadu tebes-tebes atu nune’e servisu sira bele ho seguru, alinde presiza liu instrumentu legál ida mak atu bele sai hanesan proteje atividade sira-ne’e.
“Ho ida-ne’e, ha’u hanoin ho kódigu rejistu ida sei hetan diskusaun iha Parlamentu Nasionál maibé inisiativa ida-ne’ebé Governu hanoin, no Governu haree katak lejilazaun ida-ne’e utilidade no benifísiu boot atu bele fó solusaun ba iha situasaun balun hanesan ba kazamentu barlakeadu nomós kazamentu ba iha rejiaun nomós ba iha kazamentu rejistu sivíl no seluk-seluk tan,” nia dehan.
Tanba, ho diploma ida-ne’e hakarak atu estabelese sistema rejistu sivíl ida-ne’ebé detalladu, dinámiku no seguru, ne’ebé dezeña atu garante rejistu no konservasaun ba faktu no aktu hotu-hotu ne’ebé iha relevánsia jurídika ne’ebé marka perkursu moris ema-nian, hahú husi moris to’o mate.
Enkuantu Kódigu Sivíl estabelese direitu no devér ema nian iha sira-nia relasaun familiár, patrimoniál no relasaun sosiál, Kódigu Rejistu Sivíl komplementa rejime ida ne’e hodi define regra no prosedimentu sira ne’ebé aplikavel ba rejistu ofisiál husi faktu sira-ne’e iha Estadu nia oin.
Diploma ne’e klarifika kompeténsia no prazu, introdús hadi’a prosedimentu no promove modernizasaun servisu sira, ho objetivu atu hametin seguransa jurídika, fasilita asesu sidadaun sira-nian ba rejistu sivíl no halo prosesu sai simples, efisiente no lalais liu.
Jornalista : Alexandra da Costa
Editór : Cancio Ximenes
