DILI, 05 Maiu 2026 (TATOLI)–Autór livru “Saya Mati untuk kemerdekaan”, Sergio Quintas sei la suspende nia livru, maski iha sujestaun balun atu suspende distribuisaun tanba mosu polémika iha istória.
“Ha’u sente ha’u la suspende. Livru ne’e ha’u rekoñese katak iha fallansu ne’e iha futuru sei hadi’a, depois oportunidade tuir mai ha’u sei halo lansamentu livru ba segundu edisaun,” Autór livru hateten ba Ajénsia TATOLI iha salaun Esperansa, Delta, Tersa ne’e.
Nia konsidera sujestaun husi Xefe Estadu Maiór Jenerál Forsa Armad, Falur Rate Laek, ne’ebé sujere atu suspende distribuisaun ka produsaun.
“Señor Jenerál nia apelu ne’e sujestaun, ha’u bele simu, ha’u labele simu. Ha’u la simu tanba Señor Jenerál nia sujestaun la konsidera ha’u. Tuir loloos nia mós fó espasu ba ha’u, konvida ha’u para ha’u esplika iha nia oin molok nia halo pré-konseitu, ida-ne’e halo konkluzaun mas nia la konvida ha’u, konvida de’it Luciano ho nia grupu, depois Señor Jenerál hasai konkluzaun dehan katak ha’u tenke suspende livru ne’e,” nia katak.
Notísia relevante : Tenente Jenerál Falur sujere autór livru “Saya mati untuk kemerdekaan” bele suspende distribuisaun
Defensór Públiku ne’e lamenta tanba la rona opiniaun husi eskritór no halo kedan konkluzaun.
“Ha’u nu’udar eskritór ne’e pelu menus rona ha’u. Ne’e mak buat ida dehan direitu kontraditóriu ne’e. Mais soke Señor Jenerál rona de’it Luciano nia grupu mai ho nia pré-konseitu, nia hasai despaisu hodi dehan katak fó sujestaun para hapara distribuisaun livru ne’e, mas ne’e sujestaun de’it,” nia tenik.
Nia rekoñese katak ivru ne’e iha fallansu oituan maibé buat hotu presiza tuir nia dalan.
“Labele duun ha’u dehan katak ha’u ne’e manipuladór falsifikadór tanba buat ne’e mak Luciano ho nia grupu lori ona keixa ba Ministériu Públiku, hato’o ona keixa dia 12 Fevereiru, ne’ebé ita respeitu, agora prosesu Autoridade Judisiária halo katak ha’u ne’e manipuladór duni ka falsifikadór duni tuir Luciano nia haree,” nia hato’o.
Sergio Quintas sente triste tanba Konstituisaun konsidera direitu kontraditóriu.
“Tuir loloos Señor Jenerál rona netik ha’u lai mak hasai nia konkluzaun ka hasai nia pré-konseitu,” nia katak.
Nia nota mós katak iha lei la dehan tenke suspende obra ” Iha ita-nia Konstituisaun garante ida-ne’e. Imi hatudu tok baze legál ne’e ne’ebé.”
Jornalista : Natalino Costa
Editora : Julia Chatarina
