DILI, 04 Maiu 2026 (TATOLI)—Ministériu Edukasaun (ME) hala’o semináriu ho nasaun membru Comunidade dos Países de Língua Portuguesa (CPLP) nian, hodi reforsa implementasaun alimentasaun eskolár iha Timor-Leste (TL).
Ministra Edukasaun, Dulce de Jesus Soares, hateten semináriu ne’e importante oinsá atu aprende husi nasaun CPLP nian kona-ba implementasaun programa merenda eskolár ba estudante sira.
“Forum ida-ne’e Timor-Leste hamutuk ho nasaun membru CPLP sira, ita bele aprende ba malu, pratika sira-ne’ebé di’ak iha nasaun seluk nian kona-ba implementasaun programa merenda eskolár, tanba programa merenda eskolár importante tebes. Nasaun CPLP mós rekoñese katak ita presiza túr hamutuk atu analiza no ko’alia kona-ba oinsá estudante sira bele asesu ai-han di’ak, nune’e sira realiza sira-nia poténsia iha futuru,” Dulce de Jesus Soares dehan ba jornalista sira MNEK, Praia dos Coqueiros, Dili, Segunda ne’e.
Governante ne’e hatutan programa merenda eskolár la’ós foun, maibé oinsá atu eleva di’ak liután iha Timor-Leste.
“Timor-Leste ko’alia kona-ba merenda eskolár la’ós foun. Ita hala’o ona tinan barak ona. Iha mós programa horta-pedagózika eskolár, ne’ebé mak iha mós kurríkulu nasionál baze edukasaun nian. Nune’e ita presiza de’it aprende husi nasaun sira seluk, nune’e ita bele hadi’a liután ita-nia programa merenda eskolár iha Timor-Leste,” nia dehan.
Dulce dehan, sei servisu hamutuk ho Ministériu Administrasaun Estatál no Ministériu Agrikultura hodi implementa programa merenda eskolár ba estudante sira.
“Ita sei tau hamutuk hanoin kona-ba programa merenda eskolár, ne’ebé di’akliu ba estudante sira, tanba programa merenda eskolár ne’e pursentu 75 mai husi produtu lokál,” nia esplika.
Iha fatin hanesan, Diretór Jerál CPLP, Miguel Monteiro hateten semináriu ne’e importante tebes, oinsá bele transforma ideia ba malu entre nasaun CPLP nian, ba implementasaun merenda eskolár ne’ebé di’ak no nutritivu ba estudante sira.
Semináriu ne’e partisipa husi nasaun membru CPLP ualu mak hanesan Guiné-Bissau, Timor-Leste, São Tome e Princípe, Guiné Equatorial, Cabo-Verde, Portugál, Brazíl no Moçambique.
Jornalista: Osória Marques
Editór: Xisto Freitas da Piedade
