KOVALIMA, 13 Fevereiru 2026 (TATOLI) – Autoridade Munisípiu Kovalima liuhusi Ajénsia Munisipal Fiskalizasaun (AMF), identifika eskola-sira balun, iha munisípiu Kovalima utiliza orsamentu konsesaun eskolár la tuir matadalan konsesaun eskolár.
Diretór Ajénsia Munisipal Fiskalizasaun, Anacleto Martins ,dehan razaun utilizasaun orsamentu konsesaun eskolár la tuir matadalan, tanba laiha planu atividade atu bele utiliza konsesaun eskolár ho di’ak hodi bele kompra sasan.
“Ami konsidera utiliza orsamentu konsesaun eskolár la bazeia ba matadalan,tanba eskola tenke iha planu atividade kada fulan neen se laiha planu sosa sasan bazeia ba saida, tanba iha livru planu mós iha formatu no iha livru gastu mós laiha planu fiksu,” Diretór Ajénsia Munisipal Fiskalizasaun, Anacleto Martins informa iha salaun AMC.
Tuir matadalan, nia dehan utiliza orsamentu konsesaun eskolár sira bele halo manutensaun kiik hanesan reabilitasaun mak kalen kuak, bele sosa kalen, bainhira didin atu monu mak bele sosa batako hodi hadia no hadia kadeira no meja ne’ebé aat.
Fó hanoin fali katak, orsamentu konsesaun eskolár ba fulan-11 ne’ebé eskola sira halo lavantamentu ba dala rua iha banku hanesan, iha faze ba dahuluk ba fulan neen ne’ebé maka nia utilizasaun eskola ensinu báziku no ensinu pré-eskolár ba fase dahuluk ho nia orsamentu hamutuk $ 185,765
Orsamentu konsesaun eskolár faze daruak ne’ebé orsamentu ba ensinu báziku rihun $ 143 no ba eskola pré-eskolár $ 7.572 nune’e eskola sira bele uza ba nesesidade eskola.
Ministériu Edukasaun (ME) atribui konsesaun eskolár ba pré-eskolár bazeia ba dekretu-lei númeru 84,artigu 7 ne’ebé altera husi dekretu-lei númeru 3/2016 kona-bá estatutu Administrasaun Munisipàl no atribui konsesaun eskolár ba ensinu báziku tuir dekretu-lei númeru 32/2023 artigu 69 kona-bá gastu orsamentu konsesaun eskolár tuir nesesidade eskola.
Governu atribui konsasaun eskolár fahe ba kategória hanesan,konsaun eskolár ba pré-eskolár ne’ebé responsabiliza husi Munisipàl ho nia orsamentu kada estudante $0,75 no konsesaun eskolár ba ensinu báziku responsabiliza husi Ministériu Edukasaun ho nia orsamentu kada alunu $2.00
Jornalista: Celestina Teles
Editór: Florencio Miranda Ximenes
