VIKEKE, 13 Fevereiru 2026 (TATOLI)—Prezidente Autoridade Munisípiu Vikeke, Francisco C. S. de G. Soares, Sesta ne’e, pose sekretáriu asuntu administrasaun no finansa no diretór hamutuk na’in-lima (5).
Iha serimónia pose ne’e, Prezidente Autoridade Munisípiu Vikeke, Francisco C. S. de G. Soares, husu dirijente emposada sira atu serbí ho responsablidade hodi servisu ba Estadu no povu ba konfiansa sira-ne’ebé Estadu oferese.
“Ohin ita fó pose ba ita-nia direjente sira. Pose ne’e la’ós serimónia formál atu simu kargu, maibé atu asumi responsabilidade hodi serbí integridade, lealdade no dedika an ba Estadu no povu,” Francisco hateten iha serimónia pose iha salaun Administrasaun Munisipál Vikeke.
Autoridade ne’e aprofunda, konfiasa povu nian, sosiedade no Governu oferese ba direjente sira-ne’e hodi lori dezenvolvimentu atu Vikeke labele sai alvu ba interese ema ida nian.
“Ha’u hakarak subliña katak servisu públiku mak hanesan misaun ida. Direjente sira tenke prioriza interese komunidade nian,” nia sujere.
Nomeasaun ba Sekretáriu Munisipál Administrasaun no Finansa, Diretór Sekretariadu Munisipál Administrasaun no Rekursu Umanu, Diretór Sekretariadu Munisipál Finansa, Diretór Sekretariadu Munisipál Patrimóniu no Lojístika, Diretór Sekretariadu Munisipál Edukasaun, Diretór Sekretariadu Munisipál Asisténsia Sosiál, Diretór Sekretariadu Protesaun Sivíl no Jestaun Dezastre Naturál no Diretór Ajénsia Planeamentu Munisipál Autoridade Munisipál Vikeke nian ne’e bazeia ba orden Nú. 07/M-MAE/II/2026, fó-sai iha Jornál Repúblika, 06 Fevereiru 2026.
Entidade hirak-ne’ebé simu pose mak hanesan:
- Estevão de Carvalho ba kargu Sekretáriu Munisipál Administrasaun no Finansa Autoridade Munisipál Vikeke nian;
- Rui da Costa ba kargu Diretór Administrasaun Munisipál no Servisu Rekursu Umanu Autoridade Munisipál Vikeke nian;
- Carlos Alves da Silva ba kargu Diretór Servisu Finansa Munisipál Autoridade Munisipál Vikeke nian;
- Antônio Pinto da Silva ba kargu Diretór Servisu Edukasaun Munisipál Autoridade Munisipál Vikeke nian;
- Carlos de Araújo Jerônimo ba kargu Diretór Servisu Munisipál Protesaun Sivíl no Jestaun Dezastre Naturál Autoridade Munisipál Vikeke nian;
- Marcos Rangel ba kargu Diretór Ajénsia Planeamentu Munisipál Autoridade Munisipál Vikeke nian.
Enkuantu, kargu xefia anteriór sira-ne’ebé ezoneradu mak hanesan:
- José da Costa Sousa husi kargu Sekretáriu Munisipál Administrasaun no Finansa Autoridade Munisipál Vikeke nian;
- Luís Amaral husi kargu Diretór Administrasaun Munisipál no Servisu Rekursu Umanu Autoridade Munisipál Vikeke nian;
- Estevão Carvalho husi kargu Diretór Servisu Finansa Munisipál Autoridade Munisipál Vikeke nian;
- Júlio Sacadura husi kargu Diretór Servisu Edukasaun Munisipál Autoridade Munisipál Vikeke nian;
- Jeremias de Carvalho hosi kargu Diretór Servisu Munisipál Protesaun Sivíl no Jestaun Dezastre Naturál Autoridade Munisipál Vikeke nian;
- Carlos de Araújo Jerônimo husi funsaun Diretór Ajénsia Planeamentu Munisipál Autoridade Munisipál Vikeke.
Nomeasaun no ezonerasaun sekretáriu munisipál sira no diretór servisu munisipál ne’e kompeténsia Ministériu Administrasaun Estatál nian ho baze karta ofisiál ho númeru referénsia 138/GAB-PAM/VIQUEQUE/I/2026, ne’ebé asina husi Prezidente Autoridade Munisipál Vikeke.
Serimónia pose ne’e hala’o direta husi PAM Vikeke no akompañadu husi sekretáriu munisipál na’in-rua, partisipa husi servisu diretór munisipál, veteranu, autoridade lokál, Komadante Polísia Nasionál Timor-Leste (PNTL) Munisípiu Vikeke, funsionáriu no komunidade.
Jornalista: Vitorino Lopes da Costa
Editór: Xisto Freitas da Piedade
