DILI, 13 Fevereiru 2026 (TATOLI)—Dirasaun Nasionál Transporte Terreste (DNTT) liuhusi Seksaun Manutensaun Sinál Tránzitu rejista motorista hamutuk 360 mak komete infrasaun iha implementasaun sistema semáforu modernu.
Xefe Seksaun Manutensaun Sinál Tránzitu, João Eugénio da Silva, hateten kona-ba dijitalizasaun semáforu modernu ne’ebé implementa iha fulan-Novembru 2025 ne’e, to’o agora hamutuk motorista 360 mak komete imfrasaun maibé kuaze motorista na’in-50 mak selu ona ho reseita hamutuk $1.171,00.
“Prosesu selu ne’e bainhira ami haree iha online sira komete infrasaun entaun bainhira sira mai trata kualker dokumentu transporte nian, ami haruka tiha sira selu. Balun ne’ebé seidauk mai selu depois sira sei selu bainhira mai trata dokumentu,” Xefe seksaun ne’e informa ba Agência Tatoli iha nia kna’ar fatin, Balide, ohin.
Iha fulan-Janeiru to’o Fevereiru, motorista na’in-46 mak selu ona infrasaun tanba ne’e sidadaun ne’ebé atu sosa viatura uzadu sira tenke verifika infrasaun lai iha DNTT, se lae bainhira sira mai trata dokumentu sistema deteta iha infrasaun sira tenke selu tan infrasaun ne’ebé antes ne’e komete husi ema seluk.
Nia dehan, tipu infrasaun ne’ebé iha mak motorista sira lauza kapasete, para arbiru iha zebra cross leten, semáforu seidauk kór matak sira halai tama ona, pasajeiru balun tara-an iha mokrolet, motorista mikrolete lauza farda.
Husi tipu infrasaun sira-ne’e sei selu ho koim no ba hirak ne’ebé la koopera selu $45.00, lauza kapasete $130.00, para iha zebra cross leten selu $30.00 no motorista mimrolet lauza farda selu $30.00.
“Enkuantu motorista balun ne’ebé komete infrasaun no trata sira-nia dokumentu viatura iha munisípiu mós sira nafatin selu koima tanba ami halo blokeia ona sira-nia sistema iha munisipál sira liuhusi identifikasaun xapa matríkula,” nia dehan.
Servisu monitorozasaun ba semáforu modernu ne’e routina husi loron segunda to’o domingu, iha loron segunda to’o Sesta funsionáriu sira sempre monitoriza no fó instrusaun ba semáforu ne’ebé estabelese ona, maibé iha loron sábadu no domingu sira halo de’it monotorizada lafó instrusaun maibé hakerek xapa matríkula ba motorista ne’ebé kontra sinál tránzitu.
“Dalaruma motorista balun ne’ebé komete ona infrasaun no ami identifika ona ninia xapa matríkula, maibé nia kontinua kontra ami sei la fó avizu ona. Ami fó avizu fali ba sira-ne’ebé seidauk identifika ninia xapa matríkula,” nia hateten
Tamba ne’e, nia husu ba motorista sira atu respeita sinál tránzitu tanba buat ida asidente ne’e dalaruma husi ema ida-idak ne’ebé kondus ho velosidade a’as no la kumpre sinál tránzitu.
Entretantu, tuir planu iha tinan ida-ne’e sira sei monta tan semáforu modernu 11 iha kapitál Dili, hanesan iha Balide, Bidau Lesidere, Diresaun Vaganza, Dirasaun EDTL, Villa Verde, Bemori, Kuluhun, Bidau Tokobaru, Aimutin, Elemloi Delta no Kolmera.
Jornalista : Alexandra da Costa
Editór : Cancio Ximenes
