DILI, 13 Fevereiru 2026 (TATOLI)–Ministru Obra Públika (MOP), Samuel Msarçal hateten, públiku sempre kestiona eletrisidade mate-lakan iha kapitál Dili iha loron sábadu no domingu ne’e problema tékniku la’ós problema polítika.
“Loos! Ahi sempre mate-lakan, iha kapitál Dili agora halo konstrusaun barak, entaun konstrusaun kona iha fatin ida, travesa ho eletrisidade, entaun tenke hamate ahi mak ita bele muda nia. Se ahi ne’e ita ka’er nia laxsoke mate ita, ne’e kaer ba muda de’it. Maibé ahi ne’e xoke ita mate, presiza hamate mak foin bele muda, ne’e problema tékniku la’ós polítika,” Ministru Samuel hateten ba jornalista sira iha Palásiu Prezidensiál Nicolau Lobato, Bairru Pite, ohin.
Nia dehan, daudaun ne’e kona-ba eletrisidade Governu rezolve faze ida ba faze ida seluk.
“Kona-ba eletrisidade ita rezolve faze ba faze. Faze primeiru mak ita rezolve ona husi Ponte Habibie nian, sa’e ba to’o Bekora ne’e. Buat hotu sei la’o tarde uitoan tanba sei muda komunidade sira-nia uma, balun konkorda, balun la konkorda. Ida-ne’e mak halo konstrusaun la’o tarde no prezudika ba ahi mate lakan ne’e,” nia dehan.
Ho konstrusaun ne’ebé daudaun la’o ne’e finaliza iha tempu besik maki ha fulan-Marsu ba oin ne’e eletrisidade iha kapitál Dili sei la mate tan.
“Ha’u promete depois fulan-Marsu ba oin tanba ita halo hela infrastrutura ba Under Ground fiu sira hatun ba rai-okos, kuandu finaliza hotu ona ho sub-estasaun iha Komoro finaliza ona, tuir téknika sira dehan katak fulan-Marsu ba oin bele funsiona karik laiha problema. Ha’u garante katak ahi mate ne’e só ita mak taka, sé ita la taka ahi sei la mate, ne’e husi parte Komoro ba to’o Bekora ne’ebá ne’e,” nia hateten.
Nia hatutan, husi área Akadiru-Hun to’o MOP nia oin, liu ba Katedrál, fila sa’e ba Balide, tun to’o Kuluhun, tun liu ba Fatuhada liu ba to’o Rotunda Nicolau Lobato sei hatun hotu fiu eletrisidade ba rai-okos.
“Hirak ne’e ita bele finaliza hotu, ita bele garantia Dili laran ne’e bele dehan la 100% maibé 99% ahi sei la mate. Entaun agora ha’u sei komprende, públiku sempre kestiona ahi mate, maibé ita komprende malu ba, tanba tempu besik ahi ne’e sei lakan permanente ona,” nia hateten.
Jornalista : Hortencio Sanchez
Editór : Cancio Ximenes
