DILI, 13 Fevereiru 2026 (TATOLI)—Ekipa Emanuel Football Club (FC) otimista manán Portu Taibessi iha jogu volta dahuluk faze meiu finál Tasa Liga Federasaun Futeból Timor-Leste (FFTL) 2025.
Asistente Treinadór Emanuel FC, Van Basten esplika ekipa hamutuk ho jogadór iha tempu natoon atu halo preparasaun ho masima maski iha jogadór ida mak iha faze rekuperasaun no prontu ona atu kontra Portu Taibessi iha Estádiu Munisipál Dili, Sábadu (14/02/2026).
“Ami mai ho hanoin ida hakarak hakat to’o finál maibé hahú ho jogu meiu finál no Emanuel hakarak hatudu jogu atake,” Van Basten hateten iha Estádiu Munisipál Dili, Sesta (13/02/2026).
Van Basten relata Emanuel FC mantein ho matéria jogadór ne’ebé ho espíritu ekipa no kontinua hatudu jogu ho karaterístika nakloke maski rokoñese Portu Taibessi nu’udar ekipa forte iha kompetisaun Tasa Liga FFTL.
Notísia relevante: Emanuel dudu sees AD SLB hafoin lolo Aitana 0-5
Nia garante sei manán Portu Taibessi iha-ne’ebé haree ba tabela klasifikasaun Liga Futeból Timor-Leste (LFTL), adversáriu ne’e iha pozisaun dahaat.
“Golu hanesan bónus, manán ho golu ida ka rua agradese. Mak laiha golu ami sei hadi’a iha volta daruak mai,” Van Basten argumenta.
Entretantu, Emanuel FC bainhira hakat bá faze meiu finál hafoin lidera tabela klasifikasaun Grupu A ho produtividade golu lima (5) no rekolla pontu haat (4) iha-ne’ebé susesu dudu-sai ekipa forte AD SLB.
Jornalista: Natalino Belo
Editór: Xisto Freitas da Piedade
