DILI, 13 Fevereiru 2026 (TATOLI)–Ministru Obra Públika (MOP), Samuel Marçal, husu ba empreza privada sira labele loke estrada foun iha territoriu tuir sira-nia hakarak, bainhira la hetan orientasaun husi Governu.
“Iha tinan sira ba kotuk iha empreza barak mak loke estrada barak, maibé sira halo ne’e la’ós ho inisiativa rasik. Ita halo estrada ne’e tenke haree uluk halo estudu ida kle’an, iha benefisiu ka lae, sé lae hanesan ita ba buka projetu. Se sira loke estrada konforme sira-nia hakarak, Governu lalika iha planu husik sira mak halo fali planu. Ne’ebé, husik Governu halo nia planu no serbisu,” Ministru Samuel hateten ba jornalista sira iha Palásiu Prezidensiál Nicolau Lobato, Bairru Pite, ohin.
Nia dehan, empreza hirak ne’ebé loke dalan la hetan autorizasaun husi Governu hamutuk 100-resin maibé Governu haree no konsidera de’it balun no balun la tau konsiderasaun, tanba laiha benefísiu.
“Sira halo ne’e ho intensaun atu gasta de’it osan, depois halo estraga de’it ita-nia ambiente liuliu foho sira-ne’e. Depois udan uitoan lori rai sira-ne’e tun mai mota, depois mota lori tama fali ba valeta sira-ne’e hotu intupidu iha kintu-kantu. Ita gasta osan barak hodi suru de’it rai-henek. Ne’ebé, ha’u atu dehan iha ne’e, laiha empreza ida atu ba suru tun-suru sa’e tuir sira-nia hakarak. Husik Governu mak toma konta ho nia planu atu nune’e ba oin bele iha benefisiu ba ita-nia povu no ba ita hotu,” Samuel dehan.
Nia hatutan, bainhira atu loke estrada foun iha territoriu nasionál só Governu de’it mak iha kompeténsia atu loke maibé bazeia ba estudu ne’ebé kle’an no fó benefisiu ba povu.
“Atu loke estrada foun sira husi Governu mak planeia, depois loke konkursu públiku mak empreza sira ba compete. Sé mak manán, nia mak sei kaer. Governu mak loke, atu nune’e bele haree estudu kle’an, atu nune’e halo karik to’o ramata la’ós halo la hotu soe hela, ne’e labele. Governu la autoriza empreza ida atu utiliza nia mákina sira ba fera estrada arbiru, estraga ita-nia ambiente,” nia dehan.
Jornalista : Hortencio Sanchez
Editór : Cancio Ximenes
