DILI, 13 Fevereiru 2026 (TATOLI)–Reprejentante Organizasaun Mundiál Saúde (OMS) iha Timor-Leste, Arvind Mathur, hateten atu kombate moras dengue iha Timor-Leste presiza ema hotu serbisu hamutuk.
“Kazu denge bele aumenta maibé ita bele halo mudansa, muda ne’e hahú ho asaun simples sira iha uma no iha komunidade liuhusi enkoraja ita-nia viziñu sira atu halo asaun. Tanba ne’e, mai ita hamutuk kombate moras dengue iha Timor-Leste,” Arvind Mathur hateten liuhusi nota ne’ebé TATOLI asesu husi OMS, ohin.
Nia dehan, ema idak idak tenke haree no fahe informasaun ba viziñu sira atu hamoos uma-hun.
“Fatin sira-ne’ebé besik ita-nia hela fatin ohin, fahe informasaun ba ita-nia viziñu sira. Muda loloos hatene akontese bainhira sira serbisu hamutuk, tanba ne’e pasu ki’ik ne’ebé ita halo agora sei ba bairru sira-ne’ebé saudavel liu,” nia dehan.
Antes ne’e, Ministra Saúde Élia dos Reis Amaral informa pájina ofisiál ministériu relevante, hateten katak Ministériu Saúde rejista pasiente dengue hamutuk 1800, no husi númeru ne’e iha 1600 mak alta ona maibé ema 200 mak halo tratamentu iha territóriu Timor-Leste.
“Ita iha kazu dengue 1800 itál, husi kazu ne’e rasik ita halo klarifikasaun nivel moderadu no grave. Maioria kazu ne’e iha grupu ne’e iha labarik tinan ida (1) to’o lima (5) mak sai risku. Maizumenus 200 ital, depois tinan lima (5) to’o 18, iha hotu-hotu ne’ebá maibé ita halo favór agradese ba ita-boot nia ekipamentu saúde ne’ebé integradu iha kazu ne’e ne’e halo ne’e responde,” Elia dehan.
Ministériu saúde halo ona serbisu ohin loron halo fumigasaun iha fulan-Setembru no Outubru 2025 to’o mai to’o agora.
“Ita halo ona fumigasaun iha tinan kotuk iha fulan-Setembru no Outubru maibé ita mós labele halo fumigasaun kada fulan maibé ita presiza halo interval, atu nunee substánsia kímika ne’e servisu bele ho di’ak,” nia dehan.
TATOLI
