DILI, 13 Fevereiru 2026 (TATOLI)–Governu liuhusi Sekretária Estadu Formasaun Profisionál no Empregu (SEFOPE) hamutuk ho Governu Austrália ofisialmente lansa programa Pacific Australia Skills–Timor-Leste, inisiativa rejionál ne’ebé dezeñ atu fortelese sistema edukasaun no treinamentu vokasionál (TVET), hodi aumenta kualidade abilidade forsa servisu, no alarga asesu ba oportunidade servisu ne’ebé inklusivu no sustentavel.
Atividade lansamentu programa ne’e halo husi Sekretáriu Estadu Treinamentu Profisionál no Empregu (SEFOPE), Rogério Araújo Mendonça, hamutuk ho Embaixadora Austrália iha Timor-Leste, Caitlin Wilson, ho reprezentate institusisaun Governu, instituisaun treinamentu, parseiru indústria sira seluk iha Palm Spring otél, ohin.
Sekretáriu Estadu Formasaun Profisionál no Empregu, Rogério Araújo Mendonça, hateten lansamentu ne’e sai hanesan pasu importante iha jornada Timor-Leste hodi harii nasaun ne’ebé abilidade liu no rejiliénsia.
“Loron ne’e marka pasu importante iha ita-nia jornada harii nasaun ne’ebé rejiliente, ita tau vizaun hamutuk ne’ebé Timor-Leste lidera ajenda dezenvolvimentu abilidade rasik liuhusi parseria sira-ne’ebé harii ba baze konfiansa no progresu,” Rogério Araújo Mendonça hateten liuhusi diskursu.
Nia afirma, Timor-Leste mak nasaun joven no dinámiku ho ninia populasaun 74% iha idade 35 ba kraik, tinan-tinan ema joven 18.000 tama iha merkadu servisu, enkuantu agora iha ema na’in-234.000 ne’ebé servisu kuazé 59%.
Nia dehan, kondisaun ne’e hatudu nesesidade urjente ba treinamentu vokasionál ho kualidade a’as ne’ebé bele hatan ba nesesidade merkadu servisu.
“Ho investimentu iha abilidade, ita la’ós de’it aprende téknika ida maibé mós investe iha produtu no reziliénsia nasionál. Tanba ne’e, programa Pacific Australia Skills (PAS) bele apreventa oportunidade reál ba sosiedade liuhusi treinamentu kualidade, dezenvolvimentu profisionál, parseria forte entre indústria no instituisaun edukasaun no dalan ba servisu empreendedorizmu,” nia dehan.
Programa ne’e mós enfatiza importánsia inkluzividade ho asegura feto, joven, ema ho disabilidade no komunidade iha área rurál, no inisiativa ne’e la’ós de’it kona-ba treinamentu maibé kona-ba transformasaun.
Embaixadora Austrália iha Timor-Leste, Caitlin Wilson, hateten Austrália valoriza relasaun konfiansa no kompromisu hamutuk ne’ebé iha hodi harii oportunidade no prosperidade ba sosiedade Timor-Leste.
“Lansamentu Pacific Australia Skills ba Timor-Leste mak marka importante iha parseria naruk ita-nian. Programa ne’e foku iha abilidade kualidade ba servisu atu apoia vizaun Timor-Leste iha kriasaun servisu no kreximentu ekonómiku,” nia hateten.
Nia esplika, programa ne’e harii ba baze prioridade nasionál Timor-Leste, nesesidade indústria lokál no aspirasaun sosiedade inklui parséria sira.
Programa ne’e mós kontinua susesu iha programa Austrália Pacific Training Coalition (APTC) ne’ebé iha períodu 2021–2025 apoia liuhusi ema Timor-Leste na’in-1.550 atu asesu kualifikasaun, kursu badak no treinamentu oioin hodi aumenta prontidaun servisu no apoia dezenvolvimentu nasionál.
Tuir Caitlin, Pacific Australia Skills sei servu hamutuk ho Governu Timor-Leste inklui SEFOPE no instituisaun relasionadu seluk hanesan INDIMO, fornesedór treinamentu no komunidade atu fortelese sistema abilidade nasionál.
Aleinde treinamentu ne’ebé fó, sei loke espasu ba nesesidade merkadu servisu lokál no indústria nomós loke oportunidade mobilidade forsa servisu ba Austrália liuhusi eskema Pacific Australia Labour Mobility (PALM).
“Treinamentu ne’e la’ós de’it preparadu forsa servisu iha Austrália maibé mós asegura bainhira traballadór sira fila-fali ba ida-idak nia rai ho abilidade ne’ebé sira hetan bele fó benefísiu dobru ba família, komunidade no ekonómia nasionál,” nia esplika.
Aleinde programa ne’e mós foku iha kualidade no relevante ba seguransa siber no inkluzaun sosiál tanba ne’e Pacific Australia Skills kompromisa atu asegura asesu iguál ba edukasaun no treinamentu ba joven (feto no mane), ema ho dizabilidade no komunidade iha área remota.
Ba oin, Pacific Australia Skills sei halo konsultasaun nasionál ho Governu no stakeholder (parseria) sira iha Timor-Leste.
Jornalista : Alexandra da Costa
Editór : Cancio Ximenes
