DILI, 14 Fevereiru 2026 (TATOLI) – Antigu alunu husi Jawa-Bali hamutuk na’in-20 halo doasaun raan, iha ámbitu selebrasaun Loron Domin iha 14 Fevereiru, atu tulun pasiente sira ne’ebé internadu iha Ospitál Nasionál Guido Valadares (HNGV, sigla portugés) ne’ebé presiza.
Prezidente antigu alunu Jawa-Bali, Job Brites dos Santos, hateten atividade ne’e halo relasiona ho stock raan iha Banco de Sangue ne’ebé falta.
“Ohin Valentine Day, entaun ami alumi estudante husi Jawa no Bali hakarak fahe ami domin, halo doasaun raan ba ema ne’ebé presiza. Objetivu prinsipál husi doasaun raan ne’e atu ajuda ita-nia maluk sira ne’ebé daudaun halo tratamentu iha HNGV, tanba ita haree iha notisia labarik barak moras dengue no pasiente barak presiza raan, entaun motiva ami atu mai fó netik ami-nia raan para aumenta stock hodi apoia ba pasiente sira”, Job Brites dehan ba jornalista sira, ohin.
Nia dehan objetivu seluk halo doasaun raan mak di’ak ba ema nia saúde, tanba raan ne’ebé mak halo sirkulasaun iha ema nia isin ne’e presiza hasai.
“Tanba ne’e mak ami realiza atividade ida-ne’e. Ami sente pozitivu tebes no iha benefísiu hodi ajuda pasiente sira. Ami iha kompromisu atu halo kada semana haat ka semana lima ba doasaun raan”, nia adianta.
Job Brites relata katak atividade fó raan ida-ne’e halo ba dala-tolu, iha tinan kotuk realiza iha Igreja Bekora, no rua seluk iha Banco de Sangue, Bidau.
Nia husu ba komunidade ne’ebé sente saúde di’ak bele kontribui raan turuk ida hodi sala ema seluk nia vida. “Espera ho ami-nia atividade pozitiva ida-ne’e bele fanu komunidade hotu atu iha vontade ajuda stock raan iha Banco de Sangue. Ita hatene katak raan ne’e presiza tebes, pasiente sira ne’ebé hetan asidente no presiza raan urjente mak stock laiha, nia vida la sala. Tanba ida-ne’e mak raan turuk ida ne’e sala ema seluk nia vida”, nia esplika.
Xefe Banco de Sangue iha HNGV, Alexandrino Mendonça, agradese ba antigu alunu husi Jawa-Bali ne’ebé oferese ona raan iha loron domin nian, hanesan asaun ida hato’o sira-nia domin ba pasiente sira ne’ebé iha hela HNGV.
“Kada tinan sira sempre halibur malu hodi halo atividade doasaun raan ne’e ho voluntáriu”, nia dehan.
Hodi dehan stock raan ne’ebé daudaun iha Banco de Sangue hamutuk 150, kompostu husi tipu raan A iha 40, B 48, AB 15, no O 48. “Tanba raan ne’e ita presiza loron-loron no ema mós mai halo doasaun raan ne’e mós loron-loron, ne’ebé ita bá hasai raan no raan ne’e mós tenke tama fali”, nia esplika.
Nia informa katak raan ne’ebé kada loron pasiente sira presiza barak liu mak tipu O. “Tuir dadus ne’ebé iha, ita Timór ne’e tipu raan O mak barak liu, tuir mak A no AB. Tanba daudaun ne’e raan O sufisiente hela, maibé tuir nesesidade ne’ebé iha, pasiente sira ne’ebé baixa presiza. Iha kada loron ami hatama ne’e 40 ba sira iha ospitál nasionál”.
Tanba ne’e nia husu ba komunidade bainhira iha tempu bele hakat bá Banco de Sangue hodi halo doasaun raan.
Notísia relevante: Funsionáriu APC-CVTL voluntariamente halo doasaun raan ba “Banco de Sangue” HNGV
Jornalista: Felicidade Ximenes
Editora: Maria Auxiliadora
