KOVALIMA, 14 Fevereiru 2026 (TATOLI) – Ministra Edukasaun (ME), Dulce de Jesus, no Embaixadór Portugál iha Timor-Leste, Duarte Bué Alves, inaugura eskola Sentru Aprendizajen no Formasaun Eskolár (CAFE, sigla portugés), iha Ladi, postu administrativu Suai, munisípiu Kovalima.
“Ita inaugura eskola iha Kovalima ida-ne’e ba oan sira, nune’e presiza atu kuidadu”, Dulce de Jesus hato’o iha nia diskursu, iha Ladi, ohin.
Governante ne’e husu ba autoridade Kovalima atu tau-matan ba edifísiu ne’e, tanba eskola sai hanesan fatin ba oan sira aprende, nune’e iha futuru lori dezenvolvimentu ba rai ida-ne’e.
Ministra mós husu ba inan-aman sira atu akompaña oan sira estuda no ko’alia lia-portugés iha uma, tanba bainhira hein de’it profesór sira husi Portugál mak ko’alia dalen ne’e la loos.
Iha sorin seluk, Prezidente Autoridade Munisípiu Kovalima, Miguel Armada Cardoso, dehan edukasaun hanesan prosesu ida ne’ebé ema aprende no hatene buat foun. Tuir nia, edukasaun la’ós deit iha eskola, maibé iha moris loroloron, família, komunidade no esperiénsia sosiál sira.
“Ba inan-aman no ba komunidade hotu, konstrusaun [eskola] ida-ne’e mosu liuhusi diskusaun kle’an, tanba ne’e presiza ita hotu nia tulun hodi kuída. Nune’e, manorin-na’in sira atu tranzmite sira-nia matenek ba oan sira hodi sira simu no rai metin iha idaidak nia fuan no implementa iha sira-nia moris”, nia fó hanoin.
Eskola CAFE ho totál saladeuala 12 ne’e konstrui husi empreza Aitula, iha 2023, ho totál orsamentu hamutuk $820.206,62. Edifísu ne’e mós kompleta ho bee no saneamentu.
Jornalista: Celestina Teles
Editora: Maria Auxiliadora
