TURISKAI, 14 Fevereiru 2026 (TATOLI) – Xefe Sentru Saúde Turiskai, Marino Barreto Soares, husu ba Ministeriu Saúde (MS) atu kontinua fó formasaun ba parteira sira, nune’e bele servisu iha Sentru Kuidadu Emerjénsia Obstétriku no Neonatál-Báziku (KEmON-B) hodi atende pasiente sira ho diak.
Iha Sentru Turiskai foin mak estabelese KEmON-B no daudaun iha de’it profisionál saúde nain-rua mak tuir formasaun iha Institutu Nasionál Saúde Públika Timor-Leste (INSPTL), tanba ne’e husu ba MS atu haruka tan parteira permanente sira hodi partisipa formasaun mós.
Tanba sentru ne’e foin iha pesoál rua mak tuir formasaun ba KEmON-B no iha sertifikadu, nune’e presiza aumenta ema bainhira mosu kazu emerjénsia ruma ba inan isin-rua pesoal saúde bele atende lalais.
Reprezentante INSPTL, Gergório Rangel, hateten formasaun iha INSPTL eziste programa 54, maibé 35 mak la’o ho efetivu no maioria formasaun hetan apoiu husi parseiru dezenvolvimentu sira, inklui KEmON-B ne’ebé hetan tulun husi UNFPA.
“KEmON-B ita konsege forma ona formandu hamutuk 173 mai husi nivel munísipiu, inklui sira husi Turiskai hanesan parteira ida no médiku ida. Husi formandu 173 ne’e, médiku 45 no parteira 128”, nia relata.
Jornalista: Felicidade Ximenes
Editora: Maria Auxiliadora
