DILI, 13 Fevereiru 2026 (TATOLI)—Eletrisidade Timor-Leste, Empreza Públika (EDTL, E.P), iha 2025, rekolla no kontribui reseita hamutuk $69,044,987.57 ba kofre Estadu.
“Reseita sira-ne’ebé akumula kompostu husi territóriu nasionál liuhusi atividade sira hanesan faan token enérjia, ema aluga poste riin, ligasaun ilegál, dokumentu konkursu públiku no mós osan ne’ebé ita depozita iha banku,” Vise-Prezidente Eletrisidade Timor-Leste, Júlio de Jesus Gonçalves, hateten ba Agência Tatoli iha nia kna’ar fatin, ohin.
Nia hatutan, iha atividade ka programa ida mak rekolla reseita barak-liu ne’e mak faan token enérjia, tanba kada loron sidadaun barak mak sosa pulsa ahi hodi ense ba kontadór no token ne’ebé faan iha tipu tolu mak doméstika, komersiál no trafo.
Enkuantu estimasaun reseita ba tinan ida-ne’e iha alvu millaun $70, nune’e fiar katak ho esforsu servisu ne’ebé mak iha bele atinje liután reseita ba kofre Estadu no despeza ne’ebé iha la balansu ho resita tamba kada tinan gasta uitoan maibé reseita mak aumenta.
Entretantu, nia informa, despezaiha 2025 nian hamutuk $343.293.834,38, ne’ebé kompostu husi saláriu vensimentu $15.288.562,71, bens servisu $230.912.824,72, kapitál menór $20.692.540,70 no kapitál dezenvolvimentu $76.399.906,25.
“Tamba sidadaun sira hahú hatene katak buat ida ligasaun ilegál laiha, ema komesa sosa pulsa enérjia no selu dívidas,” nia dehan.
Jornalista : Alexandra da Costa
Editór : Cancio Ximenes
