DILI, 16 Fevereiru 2026 (TATOLI)–Ekipa Emanuel Football Club (FC) susesu trava Portu Taibessi ho rezultadu ikus impata 1-1 iha jogu volta dahuluk meiu finál Tasa Liga Federasaun Futeból Timor-Leste (FFTL) 2025.
Rezultadu ikus husi jogu ekipa rua hala’o iha Estádiu Munisipál Dili, Sabadu (14/02/2026), iha-ne’ebé jogu iha parte dahuluk laiha golu to’o árbitu lian tabela skor 0-0.
Notísia relevante: Portu Taibessi garante hakat bá finál Tasa Liga FFTL
Iha parte daruak, Emanuel FC konsege lidera uluk 1-0 bainhira jogadór Angenuku Viegas prodús golu iha minutu 73, mezmu nune’e Portu Taibessi ne’ebé kompromete hakarak hakat bá finál konsege responde golu iha minutu ikus 89 liuhusi jogadór Jardiel Piedade muda tabela skor sai 1-1.
Ho rezultadu jogu referidu, ekipa rua iha pontu hanesan ka ida (1) inklui produtividade golu (+/-) 0 no ekipa rua sei deside destinu hakat bá finál iha jogu volta daruak ne’ebé sei realiza iha Estádiu Munisipál Dili, Sábadu (21/02/2026).
Jornalista: Natalino Belo
Editór: Xisto Freitas da Piedade
