DILI, 13 Fevereiru 2026 (TATOLI)—Ekipa Portu Taibessi Football Club (FC) garante gaña tiket husi Emanuel FC hodi hakat bá finál iha kompetisaun Tasa Liga Federasaun Futeból Timor-Leste (FFTL) 2025.
Treinadór Portu Taibessi, Luís Simões esplika hafoin manán Fitun Estudante Lorosa’e (FIEL) hodi serteja hakat bá meiu finál ekipa Taibessi kontinua kedas halo preparasaun ho másima atu kontra Emanuel FC iha volta daruak ne’ebè sei realiza iha Estádiu Munisipál Dili, Sábadu (14/02/2026).
“Ha’u garante sei manán bainhira kontra Emanuel,” Luís Simões hateten iha Estádiu Munisipál Dili, Sesta ne’e.
Tuir Simões katak ekipa hotu hakarak manán iha kada jogu ne’ebé hala’o inkluindu Portu Taibessi hakarak gaña vitória hodi fortifika pontu atu hakat ba finál Tasa Liga FFTL.
Notísia relevante: Emanuel otimista manán Portu Taibessi iha meiu finál
Iha fatin hanesan, Segundu Kapitaun Ekipa, Carol Waitila Fernandes Moreira hateten sei aplika materiá ne’ebé fó husi treinadór durante halo preparasaun no hamutuk ho jogadór seluk sei esforsu atu rekolla golu iha jogu kontra Emanuel.
“Ha’u garante manán iha jogu rua. Kona-ba golu, minutu 90 mak sei determina,” Carol Moreira promete.
Entretantu, Portu Taibessi reprezenta Grupu C lidera tabela klasifikasaun ho pontu hitu (7), enkuantu ekipa tolu seluk hanesan Coração FC iha pozisaun daruak, Lica-Lica Lemorai iha pozisaun datoluk no FIEL FC pontu zero (0) hafoin derrota iha jogu tolu (3).
Jornalista: Natalino Belo
Editór: Xisto Freitas da Piedade
