DILI, 16 Fevereiru 2026 (TATOLI)–Dirijente eskola sira solisita Ministériu Edukasaun (ME) atu prepara koziña no refeitóriu ba merenda eskolár.
Koordenadór Ensinu Báziku Filiál 369 Bebonuk, Abílio de Jesus Garcia dehan Governu iha planu ba merenda eskolár ne’e di’ak ona, maibé tenke konstrui fatin hodi tein ba estudante sira.
“Merenda eskolár ne’e Governu nia planu, maibé Governu seidauk estabelese koziña merenda eskolár ne’ebé di’ak. Sira la haree ba infraestrutura hanesan koziña, sasán ba te’in nian, fatin ba labarik sira tuur hodi han. Ami eskola rasik mak haloot no harii, te’in fó ba estudante sira han. Sira han mós fatin laiha. Sira tenke túr de’it iha rai mak han,” Koordenadór Abílio de Jesus Garcia dehan ba jornalista sira iha nia kna’ar fatin, Segunda ne’e.
Maski nune’e, hosi parte Ministériu Edukasaun halo ona observasaun, maibé seidauk konstrui to’o agora.
“Antes ne’e ekipa infraestrutura husi Ministériu Edukasaun mai halo ona fiskalizasaun no sukat ona atu harii, maibé to’o agora seidauk iha rezultadu fali, nune’e ami husu atubele harii hela mai eskola, nune’e bele fasilita estudante sira mós bele hetan fatin ne’ebé seguru no ijiene bainhira han,” nia dehan.
Iha fatin seluk, Diretór Ensinu Báziku Sentrál 30 Agustu, Baltazar Borromeu mós husu ba Ministériu Edukasaun atu konstrui koziña ho fasilidade ba te’in, hanesan bikan, kanuru no seluk tan.
“Ami husu atu Ministériu Edukasaun konstrui hela koziña ida ba ami, hodi te’in ba estudante sira, nune’e mós fasilidade hanesan bikan sira-ne’e. Iha-ne’e iha maibé balu aat ona. Labarik sira han dalaruma tenke hein malu, balun han hotu, depoiz mak balun han fali,” nia haktuir.
Enkuantu, Adjunta Diretora Eskola Ensinu Bazíku Filiál Bairru-Pite, Celina Maria da Costa mós husu ME atu kontrola merenda eskolár, hahú hosi hahán no fasilidade sira ba prepara hahán nian.
“Ami iha-ne’e bikan, kanuru, gas ba te’in nian no sanan sira-ne’e mak la sufisiente. Balun aat ona to’o la uza. Bikan iha-ne’e 50 de’it. Ami presiza tebes sasán sira-ne’e, tan ne’e husu ba iha Governu liuliu Ministériu Edukasaun atu kontrola merenda eskolár ne’e. Ami ne’e te’in uza ai-sunu de’it, kuandu ekipamentu sira-ne’e la sufisiente hanesan sana, gas ba te’in laiha, te’in tarde sei impaktu ba mós iha prosesu aprendizajen,” nia preokupa.
Nune’e mós, Koordenadór Pré-eskolár Sagrada Família Vila-Verde, Cornélio António Soares mós preokupa ho faslidade ba merenda eskolár, ne’ebé laiha mudansa ba estudante sira.
“Merenda eskolár ne’e, atu garante labarik sira-nia nutrisaun. Bainhira ita ko’alia kona-ba nutrisaun, ita tenke garante fasilidade ne’ebé di’ak. Koziña la sufisiente, menu laiha mudansa susar, ita atu garante merenda eskolár ho ijiene ba labarik sira oinsá,” Cornelio António Soares suspira.
Hatán ba preokupasaun ne’e, Diretór Nasionál Infraestrutura no Edukativa, Hélio Lopes hateten ME planeia ona sei konstrui koziña no refeitóriu hamutuk 24 ba Munisípiu Aileu, Dili, Kovalima no Lautein iha tinan ne’e.
Nia dehan konstrusaun kuziña no refeitóriu ne’e hetan apoiu hosi parseiru dezenvolvimentu hanesan World Food Programa (WFP) no UNICEF.
“Ita fiar katak iha tinan-2026 eskola lubuk boot ida-ne’e kompleta sira-nia koziña no refeitóriu, atu garante merenda eskolár iha eskola la’o ho di’ak no saudavel,” nia tenik.
Jornalista: Osória Marques
Editór: Xisto Freitas da Piedade
