DILI, 16 Fevereiru 2026 (TATOLI) – Kámara Komérsiu no Indústria Timor-Leste (CCI-TL, sigla portugés) simu vizita kortezia husi Embaixadór Índia iha Timor-Leste, Shri Madan Kumar Ghildiyal, hodi aborda kona-ba kooperasaun entre emprezáriu Timor-Leste no Índia iha futuru.
Prezidente CCI-TL, Jorge Serrano, hateten vizita ne’e importante tebes, tanba Índia loke ona sira-nia Embaixada iha Timór no iha posibilidade ba emprezáriu timoroan no indianu bele serbisu hamutuk, tanba Índia nu’udar país boot ida halo produsaun ba buat barak.
Nia dehan iha enkontru ohin ne’e mós embaixadór konvida CCI-TL hodi partisipa mós Expo Automation India Expo 2026, ne’ebé sei realiza entre loron 22 no 23 Jullu 2026, iha Mumbai, hodi ko’alia kona-ba Highlights industrial automation, robotics, and smart tech.
“Ohin ne’e ita enkontru dahuluk. Ba oin sei iha enkontru kle’an oinsá halo kooperasaun di’ak liután, tanba Índia nu’udar país potensiál boot iha mundu. Ita presiza kria kontaktu, loke dalan ba malu entre emprezáriu sira hodi hadi’a ita-nia ekonomia iha rai-laran”, Jorge Serrano salienta.
Nia dehan kona-ba Expo India iha tinan ne’e, sira konvida CCI-TL ba partisipa de’it no la lori produtu ruma. Iha futuru mak Timor-Leste iha expo sei konvida mós sira lori produtu mai aprezenta iha feira sira, nune’e bele koñese produtu Timór nian no timoroan mós bele koñese sira-nia produtu. “Ita-nia serbisu mak ne’e, estabelese kontaktu entre emprezáriu no promove negósiu”, dehan.
Embaixadór Índia iha Timor-Leste, Shri Madan Kumar Ghildiyal, hateten objetivu hasoru malu ho CCI-TL ne’e tanba nu’udar mahon ba setór privadu sira, nune’e liuhusi enkontru bele fó ideia ba malu no iha future bele halo kooperasaun iha área hothotu entre nasaun rua ne’e.
Tuir nia, durante ne’e Índia mós nu’udar nasaun ida ne’ebé halo importasaun sasán barak mai Timor-Leste hanesan sasán eletrónika, hahán no seluk tan.
Nune’e, enkontru ne’e sai oportunidade di’ak ba Índia bele kolabora ho CCI-TL. Iha sorumutu ne’e deside ona katak iha tinan ne’e Índia iha espozisaun no hakarak konvida Kámara Komérsiu no Indústria partisipa hodi haree dezenvolvimentu sira iha ne’ebá no sai oportunidade iha futuru bele halo kolaborasaun.
Jornalista: Arminda Fonseca
Editora: Maria Auxiliadora
