VIKEKE, 16 Fevereiru 2026 (TATOLI)–Emprezáriu timoroan, Luís Bernardo Gamboa ho inisiativa rasik apoia zinku ba família vulneravel hamutuk uma-kain 18 iha Suku Baubulu, Postu Administrativu Uatulari, Munisípiu Vikeke.
Iha distribuisaun ne’e, Luís Bernardo Gamboa, haktuir durante ne’e halo movimentu iha Suku Babulu observa direta família sira balun kondisaun uma ladi’ak ona, maibé sira laiha kibiit hodi hadi’a sira-nia uma.
“Tanba ne’e, ha’u ho inisiativa hakarak apoia netik kalén (zinku) ba ita-nia inan-aman sira sai hanesan prezente natál nian,” atuál Diretór Empreza Bere Is Back, Luís Bernardo Gamboa ba jornalista sira iha Suku Babulu, Segunda ne’e.
Luís hatutan família uma-kain 18 ne’e maihusi aldeia ualu (8) iha Suku Babulu.
Nia relata zinku ne’ebé distribui ba benefisiáriu sira hamutuk 2.700 ne’ebé fahe ba kada uma-kain sira iha-ne’ebé balun hetan tahan 60, balun hetan 140 no balun hetan 80, depende ba benefisiáriu sira-nia medida uma.
“Ha’u husu ba benefisiáriu sira katak zinku ne’ebé ha’u oferese ne’e labele fa’an, tenke uza hodi taka ba uma,” nia hato’o.
Iha biban ne’e, Reprezentante Xefe Babulu, Deolindo Marcarinhas hato’o agradesimentu ba emprezáriu Luís Bernardo Gamboa tanba tulun ona família vuneravél sira iha Suku Babulu.
“Ami autoridade lokál hakarak hato’o agradesimentu ba emprezáriu Luís Bernardo Gamboa, tanba ami husu ajuda ba Governu difísil apoiu ita-nia família vulneravel sira-ne’e. Maibé, ita-nia emprezáriu ne’e ho voluntáriu fó apoiu zinku ba ita-nia família sira,” nia tenik.
Iha fatin hanesan, benefisiáriu Sofia Imaculada Fernandes hato’o obrigadu ba emprezáriu referidu tanba ho laran di’ak tulun zinku ba família vuneravel sira hodi hadi’a sira-nia uma.
“Ha’u hakarak relata katak ha’u inan faluk ida. Ha’u-nia uma atuál kalén aat ona no ai -dodok ona no tempu udan bee tama de’it ba uma laan. Nune’e, husi tulun ne’e ha’u bele hadi’a fali ha’u-nia uma hodi hela iha laran ho seguru,” nia informa.
Entretantu, iha serimónia distribuisaun zinku ba família vulneravel ne’e partisipa husi autoridade lokál, Ofisiál Polísiamentu Suku (OPS) Suku Babulu no banefisiáriu sira.
Jornalista: Vitorino Lopes da Costa
Editór: Xisto Freitas da Piedade
