DILI, 16 Fevereiru 2026 (TATOLI)—Artista timoroan, Eufrasia Vieira, sei reperzenta Timor-Leste partisipa Miss Planet International 2026 ne’ebé tuir planu sei realiza iha Koh Pich Theater Kamboja, iha 15 Marsu 2026.
Notísia Relevante: Filme A[R]MANDA haktuir istória dignifika feto liuhosi barlake
Serimónia ne’e nu’udar parte ida husi misaun Miss Planet International nian atu halo promosaun Objetivu Dezenvolvimentu Sustentavel Nasaun Unida nian no atu fó inspirasaun inklui hakbiit partisipante sira sai modelu ka matadalan iha sira-nia komunidade no iha mundu.
Eventu ne’e ho objetivu atu halo mudansa sosiál ne’ebé atu hametin domin ba ema seluk no respeita ambiente.
“Antes ema atu hili ha’u tama kandidata iha konstestante ida-ne’e klaru la fasil; organizasaun sira-ne’e tenke check ha’u-nia background ho kle’an no loloos. Foufoun sira haree ha’u-nia forografia sira-ne’e, sira hanoin ha’u la’ós ema Timor,“ Eufrasia Vieira hakerek iha ninia varanda rede sosiál ne’ebé Agência TATOLI asesu, ohin.
Nia haktuir, ho ida-ne’e mak iha loron ida sira kontaktu no halo entrevista ba nia katak sira hakarak kandidata nia sai kandidata ida iha MISS PLANET INTERNATIONAL 2026.
“Foufoun ha’u rona ha’u ladun fiar tanba ho ha’u-nia idade ida-ne’e no ha’u-nia estatutu hanesan kaben-na’in ona, imposivel ba ha’u sai kandidata iha eventu boot ida-ne’e. Entaun sira fó valór liu ba ita-nia esperiénsia moris no impaktu husi ida-idak nia an atu kontribui ba ambiente no sosiedade atu sai saudavel liu. Entaun, ba ida-ne’e ha’u prontu,” Eufrasia hateten.
Eventu Miss Planet International 2026 ne’e sei halo grand final iha 15 Marsu 2026, nune’e ba kandidatu sira hotu iha obrigasaun atu tuir eventu ne’e sei iha obrigasaun tuir karantina iha Kamboja antes serimónia ne’e hahú
“Ha’u hau sei aranka ba Camboja iha 05 Marsu 2026. Ha’u ho kontestante husi rai selu-seluk hahú karantina ate grand final ba eventu Mis Planet International 2026 iha 15 Marsu 2026,” Eufrasua hakerek iha ninia varanda rede sosiál.
Notísia Relevante: United Picture Lansa Filme Domin A[R]MANDA
TATOLI
