DILI, 16 Fevereiru 2026 (TATOLI)—Embaixadór Fransa ba Indonézia, Timor-Leste no ASEAN, Febien Panome, hasoru malu ho Primeiru-Ministru, Kay Rala Xanana Gusmão, hodi diskute kooperasaun bilaterál iha área oioin hanesan iha área defeza nos eguransa.
“Ami fortelese relasaun entre Fransa no Timor-Leste. Durante diskusaun ami fortelese ami-nia relasaun bilaterál ne’ebé konkreta iha área defeza no seguransa, iha área agrikultura no nutrisaun, iha área turizmu no mós iha ekonomia no mós kooperasaun akadémika, kooperasaun kulturál. Ne’e parseria global,” Embaixadór Fransa ba Indonézia, Timor-Leste no ASEAN ne’e informa ba jornalista sira iha Palásiu Governu, ohin.
Nia haktuir, semana oin, Prezidente Repúblika, José Ramos Horta, sei ba vizita traballu iha Paris no hasoru Prezidente Fransa, Prezidente Emmanuel Macron.
Tanba ne’e, nia dehan, sira hakarak iha posibilidade atu fortelese rede entre Fransa no Timor-Leste, nune’e sira dezenvolve rezidénsia ba artista entre Fransa no Timor-Leste, sira mós enkoraja mobilidade sientífika entre nasaun rua no sira mós simu estudante PhD iha Fransa.
“Nune’e, Primeiru-Ministru dehan mai ha’u katak nia hakarak tebes dezenvolve kooperasaun ne’e no nia fó apoia tomak ba projetu oioin ne’ebé ami dezenvolve,” nia dehan.
Jornalista : Alexandra da Costa
Editór : Cancio Ximenes
