VIKEKE, 16 Fevereiru 2026 (TATOLI)–Inaugura ona iha Segunda ne’e obra Programa Nasionál Dezenvolvimentu Suku (PNDS) ba konstrusaun edifísiu Ensinu Sekundáriu Filiál Suku Vessoru, Postu Administrativu Uatulari, Munisípiu Vikeke.
Reprezentante Ministru Administrasaun Estatál (MAE), Antônio Augusto Guterres, ne’ebé inaugura obra ne’e haktuir katak Suku Vessoru hatudu vontade tebes hodi prepara kondisaun ba foin-sa’e sira iha era ukun rasik-an, ida-ne’e hodi prenxe dezenvolvimentu ba futura jerasaun foun liuhusi dalan edukasaun.
“Ohin ita hamutuk hodi inaugura edifísiu unidade rua ba Eskola Sekundária Filiál Vessoru, edifísiu ida konstruidu husi orsamentu PNDS Munisípiu Vikeke no edifísiu provizóriu ho sala tolu ida-ne’ebé inan-aman sira mak fó kontribuisaun hodi harii,” Antônio Guterres hateten iha serimónia inaugurasaun iha Suku Vessoru.
Nia apresia autoridade Suku Vessoru no ekipa jestaun suku sira tanba define programa prioridade suku nian di’ak tebes hodi aloka orsamentu ba konstrusaun edifísiu eskola nian, atu fasilita povu nia oan sira asesu ba edukasaun.
Iha fatin hanesan, Xefe Suku Vessoru, Paulo Fernandes relata konstrusaun edifísiu Eskola Sekundária Filiál Vessoru hamutuk rua, ida orsamentu PNDS ba tinan 2025 nian ne’ebé konstrui sala tolu gasta $44.000,00 no edifísiu provizóriu sala tolu ne’e materiál konstrusaun hanesan kalén, ai, simenti no besi ne’e komunidade mak kontribui rasik.
“Ha’u sente edifísiu rua ne’e bele sufisiente ona ba ita-nia oan estudante sira. Durante eskola sekundáriu laiha, ami-nia oan sira tenke eskola iha Postu Uatukarbau ne’ebé ho distásia dook tebes. Tan ne’e mak ami deside hamutuk hodi konstrui fasilidade sira-ne’e,” nia haktuir.
Iha biban ne’e, Koordenadór Eskola Sekundária Filiál Vessoru, Paulo Soares da Silva, hato’o agradesimentu ba parte autoridade sira, PNDS no komunidade Suku Vessoru tanba bele ajuda Suku Vessoru nia oan sira asesu ba edukasaun.
“Ami-nia eskola ne’e sala aula hamutuk neen. Sala lima uza ba ensinu aprendizajen, sala ida mak ba profesór sira. Ha’u sente sala sira-ne’e bele sufisiente ona ba estudante sira ho totál hamutuk na’in-109 no profesór na’in-8,” nia informa.
Entretantu, partisipa iha serimónia inaugurasaun ne’e husi ekipa Ministériu Edukasaun, servisu saúde, autoridade, veteranu, populasaun Suku Vessoru no estudante sira.
Jornalista: Vitorino Lopes da Costa
Editór: Xisto Freitas da Piedade
