DILI, 16 Fevereiru 2026 (TATOLI)–Diretór Nasionál Infraestrutura no Edukativa Ministériu Edukasaun (ME), Hélio Lopes informa durante mandatu Governu ida-ne’e, ME konstrui ona saladeaula hamutuk 517 iha nivel eskolaridade iha territóriu.
“Hafoin ita hakat bá tinan rua, hahú husi 2023-2025, ita konsege konstrui ona saladeaula 517, ne’ebé fonte orsamentu maihusi fundu infraestrutura, orsamentu kapitál dezenvolvimentu ministériu edukasaun nian no maihusi parseiru dezenvolvimentu, projetu Programa Nasionál Dezenvolvimentu Suku, Projetu Planeamentu Integradu Dezenvolvimentu Munisipál,” nia dehan ba jornalista sira iha nia kna’ar fatin, Vila-Verde, Segunda ne’e.
Nia esplika, husi númeru saladeaula 517 ne’e, fahe ba kada nivel eskolaridade, kompostu hosi pre-eskolár hamutuk 172, ensinu baziku 324 no ensinu sekundáriu 21.
“Aleinde saladeaula, ita mós konstrui eskola hamutuk 224, kompostu husi pre-eskolár hamutuk 85, ensinu báziku 147 no ensinu sekundáriu 12,” nia relata
Kona-ba orsamentu, dirijente ne’e informa, orsamentu la’ós maihusi orsamentu Ministériu Edukasaun de’it, maibé fonte orsamentu diferente.
“Ha’u repete tan dala ida katak, la’ós de’it orsamentu Ministériu Edukasaun maibé maihusi fonte orsamentu ne’ebé lahanesan katak balun maihusi parseiru dezenvolvimentu ka doadór sira-ne’ebé voluntariamente halo parseria ho Ministériu Edukasaun, hodi apoiu konstrusaun eskola sira-ne’ebé iha kada munisípiu,” nia esplika.
Jornalista: Osória Marques
Editór: Xisto Freitas da Piedade
