ME koordena ho MESSK transforma departamentu desportu iha UNTL ba lisensiatura
DILI, 16 Fevereiru 2026 (TATOLI)–Ministra Edukasaun, Dulce de Jesus Soares, hateten Ministériu Edukasaun (ME) koordena ona ho Ministru Ensinu Superiór, Siénsia no Kultura (MESSK) atu muda departamentu desportu iha Universidade Nasionál Timor Lorosa’e (UNTL) ba lisensiatura.
“Desportu iha Universidade Nasionál Timor Lorosa’e ne’e iha, maibé iha baxarelatu de’it. Entaun, Lei Baze Edukasaun atu hanorin iha ensinu sekundáriu ne’e nia abilitasaun literasia mínima lisensiatura. Ne’ebé, saida mak ami halo, ita kontinua halo kontratasaun ba bolsa kandidatu ne’ebé lisensiatura ne’e hanorin. Ita mós servisu hamutuk ho Ministériu Ensinu Superiór, Siénsia no Kultura atu haree posibilidade kona-ba departamentu desportu nian muda ba lisensiatura,” nia dehan ba jornalista sira iha salaun João Paulo Komoro, Segunda ne’e.
Notísia relevante: Transforma Departamentu Desportu ba Lisensiatura, Reitór: “Ita tenke ajusta”
Ministra Dulce dehan manorin desportu ho língua maláiu mak seidauk iha maibé ida-ne’e Ministériu Edukasaun esforsu oinsá fasilita formasaun didátiku ba manorin sira.
“La’ós desportu de’it mak ita la hetan manorin maibé ho língua maláiu tanba agora daudaun dezde ita ukun-an língua maláiu ita tau disiplina ida maibé depoiz iha faktu, ita-nia rai laiha departamentu iha língua maláiu,” Dulce haktuir.
Entretantu, Reitór Universidade Nasionál Timor Lorosa’e (UNTL), Joviano António da Costa, apoiu atu transforma departamentu desportu husi nivel diploma III ba lisensiatura, bainhira Ministériu Ensinu Superiór, Siénsia no Kultura (MESSK) no Ajensia Nasionál Avaliasaun Akreditasaun Akadémika prontu ona atu eleva departamentu ne’e.
Nia dehan, nia parte hatene ezisténsia departamentu desportu, más lahatene kona-ba kursu ne’e ho diploma III, maski nune’e presiza ajusta bainhira Ajénsia Nasionál Avaliasaun Akreditasaun no Akadémika (ANAAA) ho MESSK prontu ona.
“Loos duni, ita tenke ajusta buat ne’e tuir nesesidade. Ezemplu, nasaun presiza lisensiatura ita tenke kria lisensiatura la’ós kria fali diploma III. Tanba ne’e, bainhira ANAAA ho MESSK prontu ona atu eleva ba nivel lisensiatura, ha’u hanesan reitór apoiu 100% atu buat hotu bele la’o,” nia dehan.
Jornalista: Osória Marques
Editór: Xisto Freitas da Piedade
