KOVALIMA, 16 Fevereiru 2026 (TATOLI) – Profesór sira iha Munisipiu Kovalima preokupa livru liuliu ba matéria dedátiku laiha atu fasilita prosesu apredijazen iha eskola.
“Ha’u preokupa tanba durante ne’e ha’u hasoru difikuldade tanba laiha livru ba matéria dedátiku hanesan manuál ba profesór no manuál ba alunu sira hodi fasilita prosesu aprendijazen iha eskola,” Profesór João Amaral hato’o preokupasaun ne’e iha resintu EBC Ladi-ohin.
Preokupasaun ne’e, Profesór sira hato’o ba Ministra Edukasaun (ME), Dulce de Jesus, iha munisípiu Kovalima atu haree direita kondisaun eskola ne’ebé laiha livru manuál ba alunu no ba profesór.
Ministra Dulce orienta Diretór Edukasuan Kovalima tau-matan
Hataan ba preokupasaun ne’e, Ministra Edukasaun, Dulce de Jesus, orienta kedas ba Diretór Nasionál Rekursu Umanu Ministériu Edukasaun, João Amaral , atu ba haree direta eskola referidu ne’ebé mak laiha livru didátiku ba profesór no alunu sira.
“ Ita boot sira akompañia ha’u nia vizita ha’u sempre ko’alia kona-bá livru didátiku sira, tanba eskola barak bainhira ha’u ba vizita rai rahun mak ka’er livru sira ne’e, tanba ne’e bainhira la uza livru fó fali eskola ne’ebé mak presiza livru,”nia afirma.
Governante dehan kona-ba problema livru didátiku munisípiu la presiza husu ba nasionál maibé ida ne’e servisu Superintendente, Diretór sira atu haree bainhira iha eskola ida laiha livru foti fali livru ne’ebé mak butuk iha eskola no rai rahun ka’er fahe ba eskola ne’ebé mak presiza.
Koloka Profesór 193 bá Kovalima
Biban ne’e, Ministra Dulce de Jesus, mós relata katak planeia ona atu halo kolokasaun tan profesór na’in-193 mai iha munisípiu Kovalima, nune’e bele fasilita prosesu apredijazen iha eskola sira.
“ Ita sei koloka tan profesór 193 mai iha Kovalima iha inisiu fulan- Marsu 2026 ne’e mai iha Munisípiu Kovalima,” Ministra Dulce promete.
ME halo kolokasaun ba profesór sira iha área remota bainhira lakohi kumpre mak sei hasai sira nia naran iha sistema, nune’e hodi fó oportunidade ba ema seluk.
“Ministériu sei kontinua halo rekrutamentu ba profesór sira no prosesu rekrutamentu bolsa kandidatu Ministériu Edukasaun la’os haree ba família, maibé fó oportunidade ba povu timor-oan,” nia kompromete.
Iha biban hanesan, Diretora Servisu Edukasaun Munisipál Kovalima, Elda de Fátima, dehan presiza duni atu aumenta profesór sira ba siklu 1,2 no 3 tanba durante ne’e profesór ka to’o atu haorin alunu sira.
Aleinde ne’e, presiza apoia materiàl eskritóriu hanesan komputadór ho printer, tamba Departemalaentu Dezenvolvimentu Parke Eskolár nia komputadór ho printer laiha, apoiu mós materiál mobiliáriu ba eskola sira. no halo konstrusaun eskola no uma ba manorin sira.
Eskola iha Munisípiu Kovalima hamutuk 193, kompostu husi Eskola Bázika Centrál (EBC) ho nia Filiál, Eskola Sekundáriu Jerál Públiku no Eskola Tékniku Volasionál.
Jornalista:Celestina Teles
Editór:Florencio Miranda Ximenes.
