DILI, 16 Fevereiru 2026 (TATOLI)–Sekretariu Estadu Arte no Kultura (SEAK), Jorge Cristovão, segunda ne’e, hasoru malu no konvida Prezidente Repúblika José Ramos-Horta atu halo abertura ba paviliaun Timor-Leste nian iha espozisaun Biannale Venice, Itália 2026.
Notísia Relevante: Governu sei aprezenta Tais Don ba espozisaun iha Venice Biennale 2026
“Enkontru ho Prezidente atu konvida Prezidente ba halo abertura ba ita-nia paviliaun iha espozisaun Biennale Venice. Ami ko’alia ona, Prezidente konfirmadu atu hola parte hodi halo abertura ba ita-nia espozisaun 2026,” Sekretariu Estadu ne’e hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Nia dehan, espozisaun ne’e halo abertura iha loron 07 fulan-Maiu tinan 2026 ba paviliaun Timor-Leste nian iha Italia.
“Espozisaun ne’e, iha tinan 2024 ita partisipa ona, ida-ne’e hanesan espozisaun arte ida-ne’ebé mak boot-liu iha mundu, entaun iha 2024 pabilaun Timor-Leste nian hetan vizita husi ema oioin liu rihun 25. Ida-ne’e mak tinan ne’e, ita kontinua partisipa hodi promove ita-nia identidade, kultura Timor nian,” nia dehan.
Obra ne’ebé Governu prepara atu aprezenta iha espozisaun ne’e mak hanesan dadolin tradisionál, tais istória ne’ebé iha tempu pasadu boot tebes hanaran tais Don.
“Ita mós sei lori ita-nia artista tolu (3) nia obra, ida mai husi obra tais Don duni mai husi Avó Verónica, artista mak Econ Caminha no Juventino Pereira, sira-nia obra mak ita sei lori. Ohin ami aprezenta ona ba Prezidente Repúblika, hein ita ba de’it ona,” nia hateten.
Espozisaun Biennale Venezia 2026 nu’udar eEspozisaun Arte Internasionál ba da- 61 ne’e sei hala’o husi loron 09 fulan-Maiu to’o loron 22 fulan-Novembru tinan 2026, iha Giardini, Arsenale, no fatin oioin iha Veneza.
Eventu ne’e iha partisipasaun nasionál, espozisaun sentrál sira, no eventu kolaterál sira-ne’ebé destaka arte kontemporánea no billete sira disponivel online.
Informasaun xave ba Biennale Arte 2026
Biennale Arte 2026: Hala’o husi loron 09 fulan-Maiu to’o loron 22 fulan-Novembru tinan 2026.
Kuradór: Koyo Kouoh, foka ba partisipasaun nasionál no espozisaun sira arte kontemporánea nian.
Biennale Architettura 2025 (Arkitetura): Hala’o husi loron 10 fulan-Maiu to’o loron 23 fulan-Novembru tinan 2025, ho títulu “Intelijente sira. Naturál. Artifisiál. Koletivu.” Kura husi Carlo Ratti.
Fatin prinsipál sira: Giardini, Arsenale, no fatin istóriku sira iha Veneza.
Billete sira: Tenke sosa online. Early Bird (molok vizita) no deskontu ba estudante/asesu múltiplu disponivel.
Destake sira husi Espozisaun
Partisipasaun Nasionál: Nasaun oioin hatudu obra arte nian iha sira-nia paviliaun dedikadu, inklui nasaun foun sira hanesan Azerbaijaun, Oman, Qatar, no Togo iha 2025.
Eventu Kolaterál sira: Espozisaun no inisiativa adisionál sira husi instituisaun internasionál sira-ne’ebé namkari iha sidade Veneza.
Importante atu planeia ita-boot nia vizita antes, tanba ida-ne’e mak espozisaun arte no arkitetura ida ne’ebé prestijiadu liu iha mundu.
Jornalista : Hortencio Sanchez
Editór : Cancio Ximenes
