DILI, 19 Fevereiru 2026 (TATOLI)—Komisaun Rekrutamentu no Selesaun ne’ebé lidera husi Avelino Coelho no Carmelita Moniz, hasoru malu ho Prezidente Repúblika José Ramos-Horta hodi relata kona-ba progresu rekrutamentu Juiz ba Supremu Tribunál Justisa (STJ) no Tribunál Rekursu nian ne’ebé la’o hela.
Delegasaun ne’e hato’o informasaun kompletu kona-ba rezultadu servisu durante loron 30 dahuluk, hodi konfirma katak dokumentu administrativu hotu ne’ebé presiza, regulamentu internu no manuál avaliasaun nian finaliza ona atu kontinua prosesu ne’e ba oin.
“Rekrutamentu ba júri sei komesa ofisialmente iha semana oin, nu’udar pasu importante ne’ebé sei loke konkursu ba kargu juiz kounsilleiru sira. Atu asegura padraun judisiál ne’ebé aas, kandidatu sira presiza iha esperiénsia karreira pelumenus tinan 10, iha koñesimentu ba sistema sivilista no domina lian Portugés,” Avelino hateten ba jornalista sira iha Palásiu Prezidensiál, Nicolau Lobato Bairru Pite, ohin.
Nia dehan, atualmente iha vaga hitu (7) ba Supremu Tribunál Justisa, inklui mós vaga balun ne’ebé destina ba Tribunál Rekursu.
Durante audiénsia ne’e, Prezidente hato’o nia perspetiva kona-ba kalendáriu ba nomeasaun sira-ne’e, ne’ebé Komisaun iha objetivu atu instala Supremu Tribunál iha tinan ida-ne’e nia laran, karik bele akontese hamutuk ho data nasionál importante sira iha Agostu ka Setembru.
Maske Prezidente fó orientasaun kona-ba tempu nian, nia foka katak inaugurasaun finál depende ba finalizasaun rekrutamentu no prosesu selesaun ne’ebé rigorozu no susesu.
Jornalista : Hortencio Sanchez
Editór : Cancio Ximenes
