DILI, 19 Fevereiru 2026 (TATOLI)—Ministru Negósiu Estranjeiru II Brunei Darusalam, Erywan Pehim Yusof, kinta ne’e, hala’o enkontru ho Primeiru-Ministru, Kay Rala Xanana Gusmão, hodi diskute kona-ba kooperasaun bilaterál no iha kompromisu hakarak apoiu másimu Timor-Leste nia vizaun iha Asosiasaun Nasaun Sudeste Áziatiku (ASEAN).
Primeiru-Ministru, Kay Rala Xanana Gusmão, hateten hafoin Timor-Leste tama membru plenu ba ASEAN, Ministru Negósiu Estranjeiru husi Brunei Darusalam mai hatudu sira-nia deseju kompromisu atu fó apoiu nafatin ba ita iha setór oioin hanesan setór peteóleu, saúde, rekursu umanu, inklui sei observa tan ba área seluk ne’ebé presiza atu investe.
“Ita kontente tanba sira lahaluha ita no ajuda ita hodi kompleta nafatin pilár saida de’it mak ita atu halo iha membru ASEAN nian-ne’ebé buat barak ita seidauk kompletu,” Primeiru-Ministru ne’e informa ba jornalista sira iha Palásiu Governu, ohin.
Iha biban ne’e, Ministru Negósiu Estranjeiru II Brunei Darusalam, Erywan Pehim Yusof, hato’o agradesementu ba Primeiru-Ministru inklui membru mídia sira-nia prezensa ne’ebé ohin loron nia iha enkontru kortezia ne’ebé di’ak tebes ho Primeiru-Ministru iha Palásiu Governu.
“Ami-nia diskusaun ne’e amigavel tebes, ami iha hanoin kona-ba fortelese tan kooperasaun bilaterál entre Brunei no Timor-Leste iha área minerál, enerjia, iha área saúde, konektividade mós,” nia dehan.
Aleinde ne’e, Ministru ne’e mós fó kongratulsauna ba Primeiru-Ministru, Kay Rala Xanana Gusmão, kona-ba Timor-Leste nia involvimentu ba membru ASEAN iha tinan kotuk, entaun ASEAN sei iha servisu barak maibé sira sei servu hamutuk ho Timor-Leste atu halo kompleta pilár sira.
“Timor-Leste nia membru iha ASEAN ne’e signifikante, maibé sira mós sei iha preparasaun ba simeira oioin, nune’e Timor-Leste sei iha susesu iha simeira ne’ebé sei hala’o iha Dili,” nia hateten.
Entretantu, iha enkontru konrtezia ne’e marka prezensa mós husi membru Governu sira seluk hanesan Vise Primeiru-Ministru, Ministru Koordenadór Asuntu Ekonómika no Ministru Turizmu Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, Ministru Peteóleu Rekursu Minerais, Francisco da Costa Monteiro.
Jornalista : Alexandra da Costa
Editór : Cancio Ximenes
