DILI, 19 Fevereiru 2026 (TATOLI)—Ministru Negósiu Estranjeiru II Brunei Darussalam, Erywan Pehin Yusof, ne’ebé akompaña husi Ministru Negósiu Estranjeiru no Kooperasaun (MNEK) Bendito Freitas, hasoru malu ho Xefe Estadu José Ramos-Horta hodi reafirma Brunei nia apoiu estratéjiku ba Timor-Leste nu’udar membru ASEAN.
“Vizita Ministru nian ne’e importante tebes atu reafirma liutan parseria entre nasaun rua nian no aliansa estratéjika entre Timor-Leste ho Brunei ba programa dezenvolvimentu iha área importante sira hanesan edukasaun, kapasitasaun rekursu umanu, agrikulrura no seluk tan,” Ministru Bendito Freitas hateten hafoin hala’o enkontru ho Prezidente Ramos-Horta iha Palásiu Prezidensiál Nicolau Lobato, Bairru Pite, ohin.
Ministru Bendito dehan, enkontru ne’e konklui vizita ofisiál loron rua nian husi ministru mai Dili, ne’ebé sai nu’udar plataforma nivel altu hodi reafirma amizade ne’ebé kle’an entre nasaun rua ne’e no hodi konsolida apoiu ba Timor-Leste nia integrasaun nu’udar membru plenu ASEAN nian ne’ebé foin lalais akontese iha tinan 2025.
Iha fatin hanesan, Ministru Negósiu Estranjeiru II Brunei Darussalam, Erywan Pehin Yusof, hatetren Brunei fó importánsia boot ba Timor-Leste nia kna’ar iha rejiaun laran, hodi deskreve ida-ne’e nu’udar susesu istóriku ne’ebé signifikativu.
“Enkontru ne’e foka liu ba haforsa aliansa estratéjika ne’ebé kobre sektor dezenvolvimentu vitál sira, hanesan edukasaun, kapasitasaun rekursu umanu, agrikultura, saúde no konektividade teknolójika. Parseria ne’e ho objetivu atu asegura katak Timor-Leste prepara didí’ak ba nia responsabilidade rejionál sira iha futuru, inklui nia preparasaun Timor-Leste ba prezidénsia ASEAN iha tinan 2029,” Ministru Yosuf hateten.
Nia hatutan, nesesidade ba ASEAN ne’ebé unidu no reziliente iha mundu ne’ebé nakonu ho inserteza jeopolítika globál.
Ministru ne’e louva ospitalidade husi povu no Governu Timor-Leste nian, hodi nota katak nu’udar “família boot” ida, estadu-membru sira tenke kontinua sai boot no dezenvolve hamutuk. Nia manifesta konfiansa katak Timor-Leste nia prezensa sei lori kbiit foun no estabilidade ba organizasaun rejionál ne’e.
Jornalista : Hortencio Sanchez
Editór : Cancio Ximenes
