KOVALIMA, 19 Fevereiru 2026 (TATOLI) – Tékniku Eletrisidade Timor-Leste, Empreza públika (EDTL.E,P) instala ona prepagu ba kliente hamutuk 3.024 iha munisípiu Kovalima.
Xefe Unidade EDTL,E.P, Manuel Moniz Goveia Leite, dehan hahú tinan-2025, tékniku EDTL Kovalima instala ona prepagu hamutuk 3.024 ba komunidade sira iha postu Administrasaun hitu.
“Ami nia tékniku sira instala prepagu iha postu Administrativu hanesan Fatululik, Fatumea, Fohorem, Tilomar, Maucatar, Suai no iha Zumalai hela aldeia haat mak seidauk instala,” Xefe Unidade EDTL .E.P, ne’e relata ba TATOLI,I.P iha EDTL Kovalima, ohin
Razaun Aldeia haat hanesan Aldeia Dilu, Hilin, Tobur no Teda ne’ebé pertense ba suku Beco seidauk instala tanba sira foin mak asesu, nune’e sei fó oportunidade ba kliente sira asesu eletrsidade ho livre hafoin mak foin bele instala kontadór.
Populasaun TL maioria asesu liña eletrisidade
Vise-Ministru Obra Públiku (MOP), Julio do Carmo, dehan populasaun iha terróriu iha nível suku 100% asesu ona eletrisidade.
“Kona-bá eletrisidade iha Timor laran tomak suku hotu-hotu 100% mak asesu ona eletrisidade no aldeia 5% mak sei asesu eletrsidade, maibé Aldeia ne’ebé mak dook husi bairru hanesan iha Kovalima. Ita elobora ona planu iha 2026 ita atu finaliza,” Vise-Ministru afirma ba jornalista sira iha Lokeu-Suai, ohin.
Governante ne’e esplika iha Kovalima Komunidade sira iha parte poknusuk ho família uitoan seidauk asesu ba eletrisidade maske dada fiu metan, maibé sei distribui solar panel ba komunidade sira.
Iha Biban hanesan, Xefe Unidade EDTL.E.P, Manuel Moniz Goveia Leite, klarifika katak bazeia dadus iha Eletrsidade Timor-Leste Munisípiu Kovalima komunidade sira asesu hotu ona eletrisidade.
“Haree ba suku Ita nia komunidade asesu hotu ona eletrisidade falta deit sub bairru sira mak seidauk asesu eletrsidade, maibé prosesu la’o hela,” nia esplika.
Munisípiu Kovalima iha nia postu Administrativu Fatululik, Fatumea, Fohorem, Tilomar, Maucatar,Suai no Zumalai ho nia suku 30 no Aldeia 148.
Notísia relevante:EDTL Instala Prepago Unidade 120. 677
Jornalista: Celestina Teles
Editór :Florencio Miranda Ximenes
