VIKEKE, 19 Fevereiru 2026 (TATOLI)—Diretór Empreza Bere Is Back, Luís Bernardo Gamboa, klarifika kona-ba obra reabilitasaun estrada rurál kilómetru rua-resin husi Nunumalau liga bá aldeia Irlaer, Suku Matahoi.
“Foin lalais ha’u rona autoridade Uatulari hateten, ami abandona servisu konstrusaun estrada. Tan ne’e, ha’u hakarak klarifika ba públika katak ami-nia obra reabilitasaun daudaun ne’e ema servisu hela. Foin lalais la la’o ne’e kauza husi udan, kondisaun estrada aat, atu bá fatin implementasaun obra grave tebes, hodi difikulta karreta sira labele lori materiál konstrusaun,” Luís hateten ba jornalista sira iha Uatulari, Kinta ne’e.
Nia esplika obra reabilitasaun estrada Nunumalau bá Iraler sei konkluida iha tempu badak tanba konklui ona item sira hanesan valeta, drenajen no gabiaun no item rua mak seidauk konklui mak pasadeira iha mota laran ne’e.
Iha fatin ketak, Koordenadór Obra Públika Munisípiu Vikeke, Mário Ângelo Menezes, haktuir obra reabilitasaun estrada Nunumalau daudaun ne’e empreza sub kontratór Bere Is Back atinje progresu 25%.
Obra referida manán husi empreza Clv Fitun L Dawarae Unip, Lda no JV Lep Laco Dato Unip, Lda, implementa husi empreza Bere Is Back, ho pakote konstrui drenajen no cor, gasta orsamentu hamutuk $632.073,34.
Jornalista: Vitorino Lopes da Costa
Editór: Xisto Freitas da Piedade
