Parlamentu halo audiénsia antes ratifika Akordu-Kuadru kona-ba Izensaun Vistu ba membru ASEAN
DILI, 19 Fevereiru 2026 (TATOLI) – Atu ratifika proposta rezolusaun adezaun Timor-Leste ba Akordu-Kuadru Asosiasaun Nasaun Sudeste Aziátiku (ASEAN, sigla inglés) kona-ba Izensaun Vistu ba loron 14, Komisaun B ne’ebé Trata Asuntu Negósiu Estranjeiru, Defeza no Seguransa, halo audiénsia ho Ministru Interiór, Francisco da Costa, no ho Vise-Ministra ba Asuntu ASEAN, Milena Rangel.
Audiénsia ne’e halo atu rona hanoin ba proposta rezolusaun ne’e molok lori bá plenária Parlamentu Nasionál hodi halo ratifikasaun.
Milena Rangel hateten Timor-Leste tenke ratifika akordu ne’e para asegura livre asesu bá Estadu-membru hothotu. “Ita halo negosiasaun bilateralmente ho Estadu membru hotu. Ne’e izensaun vistu ba pasaporte serbisu, komún, ba estadia loron 14″, nia hateten hafoin ramata audiénsia iha Parlamentu, ohin.
Lembra katak, iha 04 Fevereiru ne’e, Governu liuhusi reuniaun Konsellu Ministru, aprova adezaun Timor-Leste nia akordu ba Akordu-Kuadru ASEAN, kona-ba izensaun vistu ho durasaun loron 14.
Akordu ne’e asina iha Kuala Lumpur, Malázia, iha loron 25 fulan-Jullu tinan 2006, estabelese baze hodi fasilita viajen iha rejiaun laran, liuhusi izensaun vistu ba estadia to’o loron 14 ba sidadaun Estadu-membru sira.
Medida ida-ne’e ho intensaun atu promove mobilidade rejionál, turizmu, interkámbiu umanu no hametin relasaun entre povu sira iha rejiaun ne’e. Akordu ne’e mós prevee katak Estadu-membru idaidak bele fó izensaun vistu ba períodu sira-ne’ebé liu loron 14, tuir ninia lejizlasaun nasionál ka akordu bilateál sira, hodi garante fleksibilidade iha definisaun ninia polítika migratória.
Jornalista: Nelson de Sousa
Editora: Maria Auxiliadora
