DILI, 19 Fevereiru 2026 (TATOLI)-Sekretaria Estadu Kooperativa (SEKoop) kuda ona, iha tinan ne’e, produtu Bafo Kayrala iha rai ektare hamutuk 189 iha munisípiu hotu-hotu.
Diretór-Jerál Kooperativa, Olderico Lopes, hateten Bafo ne’e daudaun moris di’ak no balun atu tama ona ba kolleta iha fulan-Marsu no Abríl nia laran.
“Husi ektare 189, kada ektare kolleta tonelada rua. Entaun, tinan ne’e ita sei kolleta hotu hamutuk tonelada 378”, Olderico Lopes informa.
Nia esplika katak polítika Governu nian atu implementa Bafo ne’e ba iha Programa Merenda Eskolár, maibé produtu ne’e rasik daudaun seidauk sufisiente no SEKoop kontinua halo promosaun bá eskola balun iha munisípiu sira.
“Atu implementa iha merenda eskolár ne’e presiza kuantidade boot. Daudaun, ita promove uluk bainhira produtu sufisiente ona sei implementa”, dehan.
Governu halo parseria ho Movimentu Kamponés Timor-Leste (MOKATIL) hodi fó subvensaun atu kuda Bafo no grupu kooperativa baalun mós kuda rasik produtu ne’e.
Daudaun MOKATIL halo ona kontratu ho eskola balun hanesan iha Manufahi-Same no Likisá hodi hahú implementa iha merenda eskolár.
“Ita kontinua promove no kuda iha munisípiu sira hotu, nune’e futuru implementa iha Programa Merenda Eskolár”, dehan.
Notísia relevante: SEKoop hakarak promove Bafo Kay Rala inklui iha programa Merenda Eskolár
Jornalista: Arminda Fonseca
Editora: Maria Auxiliadora
