DILI, 19 Fevereiru 2026 (TATOLI)–Primeiru-Ministru, Kay Rala Xanana Gusmão, hateten hahú iha semana oin sei halo vizita ba munisípiu sira hodi haree direta munisípiu sira-nia preparativu ba desentralizasaun Poder Lokál ne’ebé sei akontese iha tinan oin.
Notísia Relevante: PM Xanana konsidera dezentralizasaun importante ba Estadu
“Semana mai ne’e, ha’u atu sai ba munisípiu ida loron ida to’o loron 18 fulan-Marsu tanba Ministériu Administrasaun Estatál halo ona avaliasaun kona-ba serbisu sira-ne’ebé halo ona kada munisípiu. Hatene ona iha ne’ebé mak iha erru, iha ne’ebé kapasidade la to’o karik, ne’ebé agora ne’e ha’u atu ba ikus liu to’o trimestre dala tolu avaliasaun halo nafatin atu ita bele deside. Ida-ne’ebé mak bele ona ba eleisaun munisipál no ida-ne’ebé mak seidauk,” Xanana hateten ba jornalista sira hafoin ramata enkontru semanál ho Xefe Estadu iha Palásiu Prezidensiál Nicolau Lobato, Bairru Pite, ohin.
Nia dehan, avaliasaun ne’ebé durante ne’e MAE halo ba munisípiu sira hanesan iha área, finansas, administrasaun, planeamentu, ezekusaun no seluk tan.
“Ita haree, munisípiu ne’ebé mak bele tama iha eleisaun tinan 2027 ne’e, sira la’ós tama hamutuk hotu. Ezemplu, iha munisípiu ida haree ba seidauk di’ak, entaun seidauk. Munisípiu ida ita haree di’ak ona, entaun avansa ba eleisaun. Ida-ne’e para ita halo neineik-neineik desentralizasaun la’o ona Governu lokál mós la’o dadaun ona. Atu nune’e povu rasik mós bele partisipa, haree, hatene komprende, ezekusaun orsamentu ne’e la’o oinsa, planeamentu ne’e halo oinsa, la’e mai hotu sentrál, mosu nafatin problema,” Xanana dehan.
Tanba ne’e, Xefe Governu husu ona autorizasaun ba Xefe Estadu atu hala’o vizita ba munisípiu hotu durante trimestre dahuluk ne’e.
“Ida-ne’e mak ha’u husu ona ba Prezidente Repúblika atu la’o ba munisípiu sira, la’ós ba dala ida, maibé ba tiha munisípiu ida fila ba fali ida, atu nune’e Marsu hotu ita bele diskute didi’ak, hafoin hakat ba eleisaun Munisipál,” nia hateten.
Eleisaun ne’ebé atu akontese ba Asembleia Munisipál, ba deputadu Munisipál oinsá bele haree serbisu sira hotu hakbesik ba povu, nune’e povu bele asiste direta ukun husi baze.
Jornalista : Hortencio Sanchez
Editór : Cancio Ximenes
