DILI, 19 Fevereiru 2026 (TATOLI)—Governu Konstitusionál da-sia (IX) dekkara Timor-Leste kondena desizaun espulsa Enkarregadu Negósiu timoroan iha Myanmar.
Ministru Prezidénsia Konsellu Ministru, Agio Pereira, hateten Repúblika Demokrátika Timor-Leste moris metin iha nia konviksaun katak de’it liuhusi diálogo no respeitu ba vontade povu nian mak bele hetan solusaun pasífika no duradoura ba krize iha Myanmar.
“No reitera apelu ba komunidade internasionál atu hamutuk iha esforsu sira atu promove restaurasaun orden demokrátika no direitu umanus iha rejiaun,” Ministru Agio Pereira hateten liuhusi komunikadu imprensa ne’ebé Agénsia Tatoli asesu iha portál Governu, tersa (17 Fevereiru 2026) ne’e.
Timor-Leste, iha lina ho pozisaun ASEAN no Nasaun Unida nian, reitera importánsia apoiu esforsu hotu-hotu atu promove fali orden demokrátika iha Myanmar no espresa nia solidariedade ba povu Myanmar, iha momentu ne’ebé enkoraja Junta Militar atu respeita direitu umanu no buka solusaun pasífika no konstrutiva ba krize.
Nune’e ho situasaun iha Myanmar sai ona motivu preokupasaun globál husi golpe militar iha Fevereiru 2021, komunidade internasionál, inklui Timor-Leste, kontinua apela ba rezolusaun pasífika krize no respeitu ba direitu fundamentál povu Myanmar nian.
Jornalista : Alexandra da Costa
Editór : Cancio Ximenes
