DILI, 20 Fevereiru 2026 (TATOLI) – Komisaun Nasionál Eleisaun (CNE, sigla portugés), realiza atividade edukasaun sívika kona-ba konsolida demokrasia no integridade eleisaun ba estudante Eskola Sekundária São Pedro iha Komoro, Dili.
Diretor Nasionál Rekursu Umanu Administrasaun no Peskiza iha CNE, Franquelino da Silva Gusmão, hateten edukasaun sívika ne’e nia alvu ba estudante sira, tanba sira mak eleitór foun atu partisipa iha eleisaun parlamentár, asembleia munisipál no prezidensiál iha tinan oin mai.
“Ne’e responsabilidade órgaun eleitorál, atu kontinua divulga informasaun ligadu ba eleisaun nian, komprende regra no andamentu sira atu hafásil eleitór ativu no pasivu sira-nia kompriensaun hodi bele hasa’e taxa partisipasaun eleitór nia”, nia hato’o.
Sensibilizasaun ba estudante sira ho idade 16 to’o 17 hodi bele rejistu hetan kartaun eleitorál hodi partisipa iha eleisaun mai.
CNE lansa programa ne’e horisehik iha Aileu no hanesan programa nasionál ne’ebé hala’o iha munisípiu hotu ho alvu ba estudante sira, feto potensiál, líder polítiku no komunidade hotu.
Franquelino Gusmão informa katak, iha Dili, identifika ona eskola São Miguel, São José Operário, no seluk tan atu halo programa sensibilizasaun ne’e.
Diretór Sekretariadu Tékniku Administrasaun Eleitorál (STAE) munisípiu Díli, Maria de Deus, hateten STAE Dili rejista ona eleitór foun 9.878-resin no eleitór ne’ebé renova sira-nia kartaun biométrika hamutuk rihun 66-resin no Dili rejista númeru eleitór barak liu kompara ho munisípiu sira seluk.
Nune’e, nia apela ba eleitór foun sira atu bá STAE halo kartaun eleitorál hodi tuir eleisaun sira ne’ebé sei realiza iha tinan oin.
Adjuntu Eskola São Pedro Komoro, João Belo, husu ba estudante sira ne’ebé partisipa iha sosializasaun ne’e atu tau atensaun didi’ak, nune’e bele habelar informasaun ba ema seluk ne’ebé seidauk hatene kona-ba oinsá atu tuir eleisaun tuir idaidak nia konxiénsia, nune’e demokrasia ne’e bele buras ba beibeik.
Jornalista: Nelson de Sousa
Editora: Maria Auxiliadora
