DILI, 20 Fevereiru 2026 (TATOLI)—Sekretáriu Estadu Ensinu Sekundáriu Jerál no Tékniku Vokasionál (ESJ-ESTV), Domingos Lopes Lemos, lansa no instala tan ona projetór no komputadór 323 ba saladeaula iha Ensinu Sekundáriu Jerál (ESJ) Bekora.
“Agora ita instala hela projetór no komputadór hamutuk 323 ba saladeaula iha ESJ 12 Novembru hodibele ajuda profesór sira hanorin,” nia dehan ba jornalista sira iha ESJ 12 Novemberu, Sesta ne’e.
Nia esplika eskola sira-ne’ebé instala ona projetór no komputadór mak hanesan ESJ 12 Novembru, ESJ 4 Setembru, ESJ 5 de Maio, ESJ Finantil, Metinaru no Hera.
Domingos dehan orsamentu ba ekipamentu referidu maihusi kapitál menór tinan-2025 ho montante rihun $90.
Governante ne’e apela ba estudante sira atu kuidadu ekipamentu hirak-ne’e, hodi uza ba tempu naruk.
Iha fatin hanesan, Diretór ESJ 12 Novembru, Marcelino Menezes Babo, informa ohin instala ona ekipamentu ne’e maibé iha difikuldade mak profesór ne’ebé idade ona, tanba ne’e sira enfrenta difikuldade ba teknolojia ohin loron.
“Aleinde ne’e, problema liña internet seidauk iha, tanba ne’e ami esforsu hela oinsá atubele iha liña internet, nune’e másimu ba prosesu aprendizajen,” nia tenik.
Entretantu, totál estudante iha ESJ 12 Novemberu hamutuk 1.338, profesór hamutuk 31.
Jornalista: Osória Marques
Editór: Xisto Freitas da Piedade
