DILI, 20 Fevereiru 2026 (TATOLI) – Jornalista joven na’in-rua husi Timor-Leste, Cidália Antoninha Fátima da Conceição no David da Costa Gusmão, selesionadu nu’udar destinatáriu dahuluk ba Bolsa Estudu Mídia Interese Públiku Timor-Leste, programa parseria entre Governu Austrália ho ABC International Development, hodi aprofunda koñesimentu iha área jornalizmu investigativu iha Austrália.
Embaixadora Austrália iha Timor-Leste, Caitlin Wilson, durante enkontru ho destinatáriu bolseiru sira iha Embaixada Austrália iha Dili, hato’o ninia apresiasaun ba kualidade investigasaun ne’ebé sira propoin, partikularmente kona-ba kestaun lixu médiku no violénsia seksuál hasoru labarik-feto sira.
“Ha’u haksolok tebes hasoru maluk sira na’in-rua nu’udar destinatáriu dahuluk ba bolsa estudu ne’e. Ami sente orgullu bele halo parseria ho ABC International Development kona-ba programa foun ida-ne’e”, embaixadora dehan.
Nia subliña katak husi perspetiva Austrália nian, Korporasaun Radiodifuzaun Austrália nian (ABC) maka ezemplu forte ida husi valór sira husi jornalizmu investigativu, responsabilizasaun, liberdade imprensa, no reportajen étika no responsavel.
Liuhusi programa ida-ne’e, destinatáriu bolseiru na’in-rua ne’e sei pasa tempu iha Sydney no Melbourne hodi serbisu hamutuk ho ekipa ABC nian. Sira sei aprende funsionamentu sira husi sala redasaun boot ida, hodi foti desizaun editoriál nian to’o implementasaun padraun sira produsaun notísia nian.
“Ita sei haree rasik siklu notísia tomak, oinsá desizaun sira halo, no oinsá prosesu editoriál funsiona iha sala redasaun boot ida”, nia esplika.
Jornalista na’in-rua ne’e mós sei hetan mentorizasaun husi mentór dedikadu sira, inklui Caroline husi ABC Dezenvolvimentu Internasionál, ne’ebé sei kontinua harii relasaun profisionál ba tempu naruk ho partisipante sira.
Bolseira Cidália Antoninha Fátima da Conceição nu’udar jornalista husi Tatoli hato’o agradesimentu ba oportunidade ne’ebé nia hetan. “Ha’u espera katak liuhusi programa ida-ne’e, ha’u bele dezenvolve ha’u-nia abilidade relatóriu, liuliu hato’o sentimentu vítima sira-nian ne’ebé dalabarak la hatene se seguru ba sira atu fila bá eskola”, nia hateten.
David da Costa Gusmão husi mídia Neon Metin hateten esperiénsia semana rua iha Austrália sei sai oportunidade krusiál ida hodi hadi’a nia kapasidade hodi dezenvolve proposta investigativu sira, partikularmente kona-ba kestaun lixu médiku nian.
“Ha’u hein atu aprofunda ha’u-nia abilidade iha jornalizmu investigativu no dezenvolve proposta ne’ebé ha’u prepara ona”, nia hateten.
Programa bolsa estudu ida-ne’e uluk fó sai iha Outubru 2025 no loke ba jornalista timoroan sira ho idade tinan 30 mai kraik ne’ebé ativu prodús konteúdu iha lia-tetun, portugés, no inglés.
Programa ne’e ho objetivu atu hametin kapasidade jornalizmu interese públiku no promove prátika reportajen ne’ebé responsabiliza iha Timor-Leste.
Tuir planu, jornalista na’in rua ne’e sei aranka bá Austrália iha 21 Fevereiru no sei fila 07 Marsu 2026.
Jornalista: Arminda Fonseca
Editora: Maria Auxiliadora
