DILI, 20 Fevereiru 2026 (TATOLI) – Ministru Komérsiu no Indústri (MKI), Filipus Nino Pereira, hateten Loja do Povo ne’ebé estabelese husi Governu anteriór daudaun ne’e balun la funsiona ho di’ak.
“Iha tinan ikus 2023, ami halo fiskalizasaun no monitorizasaun bá iha munisípiu Ainaru no Kovalima haree loja balun la’o di’ak, maibé balun iha problema oituan kona-ba fatin ne’ebé nia na’in la klaru, paradu totál, hanesan iha Manufahi”, Filipus Nino Pereira hateten iha Ministériu Finansa, ohin.
Nia dehan ba munisípiu sira seluk, daudaun ministériu sei buka informasaun husi Diresaun Nasionál Apoia Dezenvolvimentu Mikro, Pekena, Média Empreza ne’ebé toma konta ba ida-ne’e.
“Ita sei halo konfirmasaun ho autoridade munisípiu sira atu haree no bele halo akompañamentu estatutu agora Loja do Povo nian. Tanba ida-ne’e, apoiu ne’ebé mai husi Governu bainhira la la’o fó impaktu tebes tanba orsamentu ne’ebé prevee konstrui ba loja ne’e husi fundu subvensaun públika ninian, ne’ebé montante boot”, dehan.
Governante ne’e fiar katak sira ne’ebé simu responsabilidade ba Loja do Povo ne’e tenke jere ho konfiansa, responsabilidade, tanba osan povu nian tenke jere ho di’ak.
“Ita nafatin ezije sira-nia profisionalizmu ne’e. Oinsá halo jestaun ne’ebé di’ak, kontinua fó rezultadu ne’ebé mak di’ak, tanba faktu ne’ebé ami hetan iha terrenu ne’e sira hasoru problema barak hanesan kona-ba jestaun, lideransa, no rekursu asset ne’ebé sira iha ne’e la klaru, maibé daudaun sei halo esforsu atu haree ninia progresu sira”, dehan.
Estabelesimentu Loja do Povo ida-ne’e husi VIII Governu ho objetivu atu diversifika ekonomia no halo reziliénsia soberania ai-han iha timoroan nia liman rasik, no atu responde ba preokupasaun husi agrikultór sira kona-ba merkadu ba produtu ne’ebé sira prodús.
Ho estabelesimentu Loja do Povo ne’e atu simu produtu lokál husi povu sira hodi fa’an. Ne’e faze ida Governu loke espasu merkadu ba povu agrikultór sira hodi fa’an sira-nian produtu.
Lembra katak, iha tinan 2022 no 2023, Loja do Povo ne’ebé estabelese iha munisípiu sira hanesan Dili, Ainaru, Lautein, Kovalima, Baukau no Manufahi.
Iha 2022, ministériu asina kontratu ho empreza haat ho osan ba kada ho valór rihun $50. Grupu sira ne’e mak Casa Nova Fresca, Unipessoal Lda, Comvaça iha Dili, Hibahitirokap Nunes, Unipessoal Lda, grupu Produtores Same Putri Lialuli, Unipessoal Lda, iha Kovalima, no Maubere Spirit, Unipessoal Lda, iha Baukau.
Iha 2023, estabelesimentu “Loja do Povo” liuhosi kontratu entre Governu no empreza ka grupu ho osan montante ba kada empreza rihun $50. Kriasaun loja ba dahuluk mak Cesária Lari Tame, Unipessoal Lda, grupu Cooperativa Camponês Maubere (CCM) iha Dili, Kooperativa Multi-setorál, empreza Monica dos Santos, Unipessoal Lda, iha Ainaru, no Kooperativa Mua Tchau, Cipriano Feliz, Unipessoal Lda, iha Lautein.
Notísia relevante: SEKoop no MTKI lansa Loja do Povo iha Rialau Manufahi
Jornalista: Arminda Fonseca
Editora: Maria Auxiliadora
