BOBONARU, 20 Fevereiru 2026 (TATOLI) – Ekipa téknika husi empreza internasionál PT. Minarta halo ona levantamentu dadus ba kondisaun rai iha kanál irrigasaun Maliana I ne’ebé hetan danus kauza husi udan-boot foin lalais ne’e tuir orientasaun husi Ministru Agrikultura, Pekuária, Peska no Floresta (MAPPF), Marcos da Cruz.
Antes ne’e, iha loron 17 Fevereiru, Ministru Marcos da Cruz, ho diretór nasionál no Prezidendente Autoridade Munisípiu Bobonaru sira mós halo ona observasaun ba kanál irrigasaun Maliana I no haree mós projetu reabilitasaun irrigasaun Maliana II.
Governu liuhusi MAPPF husu apoia PT. Minarta atu halo normalizasaun emerjénsia ba irrigasaun referida hodi garante distribuisaun bee ba natar kontinua la’o, tanba daudaun ne’e tama ona faze kultiva hare époka dahuluk tinan 2026.
Agrikultór Maliana Rogério Bere Biti dehan prontu apoia empreza Minarta hodi aselera serbisu normalziasaun irrigasaun ne’e iha tempu badak.
Notísia relevante: MAPPF sei reabilita ponte kanál irrigasaun Maliana I
“Horisehik ho hori bainrua ne’e sira mai survey kondisaun iha terrenu, tanba klima udan ona rai ne’e halai tan. Ida-ne’e mak ha’u senti empreza iha situasaun difísil uitoan, maibé ami fiar sira iha tékniku buka meiu oinsá bele salva bee ne’e tama ba kanu laran”, nia dehan.
Daudaun ne’e, natar-nain sira parte irrigasaun Maliana I hasoru difikuldade tanba iha ona períodu prepara veiveiru hare mak bee laiha. “Hare konsege moris, más ladun di’ak. Nia afeta ne’e husi bee irrigasaun la di’ak, no mós estraga husi manu, laho no karakól”, katak.
Seguransa irrigasaun Maliana I, João Mali Belo, haktuir katak irrigasaun ne’e hetan danus tanba estrurura rai la metin. “Akontese primeiru ne’e iha loron 01 Fevereiru, entaun agrikultór sira kontribui osan no apoia husi diresaun agrikultura hadi’a tiha bee. Iha fali loron 15 Fevereiru ne’e aat totál fali, bee labele liu ba tanba nia kanu haliis tiha”, dehan.
Irrigasaun Maliana I reabilita husi parseiru internasionál JICA entre tinan 2008 no 2009 no obra ne’e hanesan ajuda husi povu Japaun nudar sinál amizade no kooperasaun entre nasaun rua.
Tuir dadus, irrigasaun ne’e sei fornese bee ba natar hamutuk ektare 1.050-resin.
Notísia relevante: Ponte kanál irrigasaun Maliana I iha Mamaruman haliis
Jornalista: Sergio da Cruz
Editora: Maria Auxiliadora
