DILI, 20 Fevereiru 2026 (TATOLI)—Ekipa Portu Taibessi Football Club (FC) mantein estratéjia hodi kontra Emanuel iha volta daruak faze meiu finál Tasa Liga Federasaun Futeból Timor-Leste (FFTL) ne’ebé sei hala’o iha Estádiu Munisipál, Sábadu (21/02/2026).
Treinadór Portu Taibessi FC, Luís Simões esplika desizaun ne’e foti bazeia ba rezultadu jogu iha volta dahuluk ne’ebé rezultadu ikus impata 1-1 nune’e durante semana-ida nafatin masimiza liuhusi preparasaun no ekipa preparadu atu hasoru Emanuel FC.
“Maski Emanuel halo atake, ami mos hakarak atake maka’as,” Luís Simões hateten iha Estádiu Munisipál Dili, Sesta (20/02/2026).
Notísia relevante: Emanuel FC mehi golu dahuluk bainhira kontra Portu Taibessi
Nia relata biar Emanuel deklara hakarak enxe uluk golu iha parte dahuluk maibé Portu Taibessi lakohi fó oportunidade no posibilidade sei prodús uluk golu bainhira lansa kontra-atake ba grandeia Emanuel nian.
Nia argumentu mezmu kapitaun prinsipál Cláudio Araújo absénsia iha jogu aban kauza ferida (cedera-sigla Indonézia) maibé la afeta ba liña defeza tanba iha jogadór supliente ne’ebé bele troka.
“Ami garante manán kontra Emanuel,” Luís Simões promete.
Iha fatin hanesan, Segundu Kapitaun Portu Taibessi, Geovani Araújo hateten prontu no preparadu ona manán Emanuel FC iha volta daruak ne’e.
Entretantu, Portu Taibessi no Emanuel FC sei hadau billete ida hodi hakat bá finál Tasa Liga FFTL hafoin iha volta dahuluk impata 1-1 iha Estádiu Munisipál Dili, Sábadu (14/02/2026).
Jornalista: Natalino Belo
Editór: Xisto Freitas da Piedade
